Маны аах Нацбырайыактар Тыа хаһаайыстыбата

«Агростартап» грана таһаарыылаах үлэҕэ көҕүлүүр

Өрөспүүбүлүкэ бааһынайдара (фермердэрэ) федеральнай бырагыраамаларга тирэҕирэннэр, араас хайысхалаах тыа хаһаайыстыбатын үлэтин-хамнаһын тэрийэллэр.

Бааһынай хаһаайыстыбалар баһылыктара 2012-2018 сс. федеральнай бырагырааманан 874 («Саҥа саҕалыыр бааһынай хаһаайыстыба» федеральнай бырагырааманан – 699, «Бааһынай хаһаайыстыба баазатыгар дьиэ кэргэн пиэрмэтин сайыннарыы» федеральнай бырагырааманан 175) граны ылбыттара. Бу сыалга 1,8 млрд, ол иһигэр 1,4 млрд солк. федерация бүддьүөтүттэн, 483 мөл. солк. өрөспүүбүлүкэ бүддьүөтүттэн көрүллүбүтэ.

2019 сыллаахтан «Саҥа саҕалыыр бааһынай хаһаайыстыба» федеральнай бырагыраама оннугар «Дьоҕус уонна орто урбаан итиэннэ биирдэм урбаан көҕүлээһинин сайыннарыы» национальнай бырайыак чэрчитинэн, «Агростартап» грана киллэриллибитэ. Бырагыраама үлэлиир болдьоҕо 2024 сыллаахха диэри быһыллыбыта. Онон 2019 сылтан 2024 сыллаахха диэри кэм устатыгар «Агростартап» бырагыраама граныгар тирэҕирэн, өрөспүүбүлүкэҕэ 170 саҥа бааһынай хаһаайыстыбатын тэрийэр, 340 үлэ миэстэтин таһаарар сорук туруоруллубута.

2019 с. грант ылбыт 41 бааһынайга судаарыстыбаттан 105 мөл. солк. харчы көрүллүбүтэ. 2020 с. граны 34 киһи ылбыта, судаарыстыба көмө харчыта 115 мөл. солк. буолбута. Быйыл граны 38 киһи ылла, онно 107 мөл. солк. көрүлүннэ.

Элбэхтэн аҕыйах холобуру аҕаллахха, 2019 с. грант ылбыт Хонуу сэлиэнньэтин олохтооҕо Петр Слепцов Мэҥэ Хаҥаластан уонтан тахса тыйы атыылаһан илдьэн, Муомаҕа сылгы иитиитин сайыннарарга ылсан үлэлии-хамсыы сылдьар. Томпо хоһуун кыыһа Валентина Гермогенова илин эҥээр улуустартан 17 саха сүөһүтүн тиэйэн илдьэн, Охотскай Перевозка иитэр. Амма улууһун Сатаҕайыгар Айтал Неустроев бочугурас иитэр пиэрмэни тэрийэн, сымыыты куоракка тиийэ батарар. Бу курдук төһө баҕарар үгүс киһини холобурдуохха сөп.

Раиса Сибирякова, «Саха сирэ», edersaas.ru

0
0