Бүгүҥҥүттэн «Агростартап» гранын куонкуруһугар бырайыактары көмүскээһин саҕаланна.
edersaas.ru
Бастакынан Амма, Абый, Муома, Булуҥ, Кэбээйи, Усуйаана улуустарын бэрэстэбиитэллэрэ көмүскээтилэр. Кинилэр ынах сүөһүнү, сылгыны, табаны, мүөттээх ыҥырыалары иитиигэ, сир аһын астааһыҥҥа, оҕуруот аһын үүннэриигэ үлэни-хамнаһы тэрийэр бырайыактары оҥорон аҕалбыттар.
Тыа хаһаайыстыбатын миниистирин солбуйааччы Николай Афанасьев салайааччылаах 15 киһилээх хамыыһыйа чилиэннэрин кэккэтигэр министиэристибэ үлэһиттэрэ итиэннэ уопсастыбаннай тэрилтэлэр бэрэстэбиитэллэрэ, ол иһигэр АККОР бэрэсидьиэнэ Александр Артемьев, Уопсастыбанай палаата чилиэнэ Леонид Чусовской, Тыа сирин дьахталларын хамсааһынын лидерэ Зарема Бочкарева, ТХПК-лар эрэбиисийэлиир сойуустарын дириэктэрэ Мария Алексеева о.д.а. бааллар.
Хас биирдии киһиэхэ 5 мүнүүтэ бэриллэр. Санатан эттэхэ, «Агростартап» грана «Дьоҕус уонна орто урбаан итиэннэ биирдэм урбаан көҕүлээһинин сайыннарыы» национальнай бырайыак чэрчитинэн, 2019 сылтан үлэлиир. Куонкурус кыайыылаахтара хайысхаларынан тутулуктанан 5 мөл. солк тиийэ субсидияны ылыахтара. Быйыл 140 сайабылыанньа бэриллибититтэн ситэтэ суох докумуоннаахтар туоратыллан, куонкуруска 118 бырайыак киллэрилиннэ, бу бырагырааманан 107 мөл. 904 тыһ. солк. көрүлүннэ.
«Агростартап» бырагыраамата үлэлиэҕиттэн, 2019 сылтан, биһиги өрөспүүбүлүкэбитигэр 75 бырайыакка 220 мөл. солк. суумалаах грант көрүллүбүтэ диэн министиэристибэ пресс-киинэ иһитиннэрэр.
Раиса Сибирякова, «Саха сирэ» edersaas.ru