Бүгүн, олунньу 1 күнүгэр, «Саха» НКИХ ханаалыгар 11.00 чаастан СӨ бырабыыталыстыбатын 2019 сыллааҕы үлэтин отчуоттаата.
Уус Алдан Хомустааҕыттан быһа сибээскэ тахсан «Агростартап» гранын куонукруһа хайдах балаһыанньалаахтык ыытылларын ыйыттылар.
Тыа хаһаайыстыбатын миниистирэ Александр Атласов бу грант 2019-2024 сылларга үлэлиэҕэ диэтэ. Бастатан туран, бу граҥҥа кыттарга кыттааччы чааһынай урбаанньыт буолуохтааҕын уонна бааһынай хаһаайыстыба тэриммит буолуохтааҕын ыйда. Тыа хаһаайыстыбатынан дьарыктаныан, ылсан үлэлиэн баҕалаах дьон хайаатар даҕаны, өскөтүн, икки мөлүйүөн суумалаах граҥҥа кыттар киһи биир үлэ миэстэтин, онтон улахан суумаҕа кыттар киһи икки үлэ миэстэтин таһаарыахтааҕын миниистир эттэ. Ону сэргэ, Тыа хаһаайыстыбатын министиэристибэтин 101 кабинетыгар тустаах дьон кэлэн ыйыталаһалларыгар эттэ.
Тыа хаһаайыстыбатын миниистирин Александр Атласов этиитигэр бырабыыталыстыба бэрэссэдээтэлэ Владимир Солодов, улуустартан граҥҥа кыттар дьон МФЦ нөҥүө судургутук тустаах ыйытыыга эппиэти ылыахтаахтарын эттэ. Хас биирдии министиэристибэ, дьон-сэргэ кыһалҕатын быһаарар туһугар үлэлииллэрин бэлиэтээтэ.
Ульяна ЗАХАРОВА, edersaas.ru