Сиртэн өлгөм итиэннэ туох да ыарыыта суох, чэгиэн-чэбдик үүнээйини ылар туһугар араас идэтийбит сириэстибэлэр туһаныллаллар.
Бу күннэргэ Тыа хаһаайыстыбатын министиэристибэтигэр ыытыллыбыт агрономнар сэминээрдэригэр үүнээйи харыстабылын тэрийиигэ киэҥ кэпсэтии таҕыста. Сэминээри министиэристибэ «Щелково Агрохим» аахсыйалаах уопсастыба Уһук Илиҥҥэ бэрэстэбиитэлэ «ПримАгро» ХЭТ уонна “Россельхозкиин” федеральнай судаарыстыбаннай бүддьүөт тэрилтэтин Саха сиринээҕи салаатын кытары тэрийдэ. Онно ССТХНЧИ учуонайдара, “Сир сулууспата” судаарыстыбаннай бүддьүөт тэрилтэтин агрономнара, сиргэ үлэлиир хаһаайыстыбалар салайааччылара, исписэлиистэрэ, СГТХА преподавателлэрэ, устудьуоннара кытыыны ыллылар. «ПримАгро» ХЭТ генеральнай дириэктэрэ Марина Чистова уонна агроном Наталья Морозова хампаанньа үлэтин-хамнаһын,үүнээйилэри үөнтэн-көйүүртэн уонна ыарыылартан харыстааһын дьаһалларын туһунан сиһилии кэпсээтилэр. Бурдук уонна хортуоппуй үүнэр көхтөрүн арыйарга пестицидтэри уонна агрохимикаттары туһаныы аныгы технологияларын итиэннэ схематын быһаардылар. Ыйытыыларга хоруйдаатылар.
— «Щелково Агрохим» хампаанньа тыа хаһаайыстыбатын табаарын оҥорооччулары үүнээйини харыстыыр көдьүүстээх, эрэллээх сириэстибэлэринэн хааччыйар хампаанньа быһыытынан биллэр. Кини бородууксуйатын хаачыстыбата үрдүк, сыаната сөбүгэр, онон атыылаһааччы киэҥ араҥатыгар сөбүгэр, — дэстилэр.
Хаһаайыстыбалар пестицидтэри итиэннэ агрохимикаттары туһаныыга улахан интэриэстээхтэрин биллэрдилэр. Даҕатан эттэххэ, “Россельхозкиин” Саха сиринээҕи салаата бу тэрилтэни кытары үһүс сылын агентскай дуогабар быһыытынан бииргэ үлэлиир. Аны сайын “Хонуу күнүн” бырааһынньыгар бааһынаҕа көрдөрүүлээх уопуту көрдөрөр былааннаахтар. Билигин “Россельхозкиин” хаһаайыстыбалар сайаапкаларынан, 2 тыһ. 778 л пестициди уонна агрохимикаты аҕаларга үлэлэһэ сылдьар.
Раиса Сибирякова, «Саха сирэ» хаһыат, edersaas.ru
