Самсоновтар ааттарынан Хатас орто оскуолата 2015 сылтан аграрнай хайысханан үлэлиир.
edersaas.ru
Былырыын “Үөрэхтээһин” национальнай бырайыак чэрчитинэн үлэлиир “Хас биирдии оҕо ситиһиитэ” федеральнай бырайыак гранын куонкуруһугар Хатастааҕы агро-оскуола дойду араас эрэгийиэннэриттэн кыттыбыт тыа сирин 91 оскуолатын кытары күрэстэһэн, “Уопсай үөрэхтээһин тэрилтэтин баазатыгар научнай-чинчийэр лабораторияны тэрийии” диэн 2 №-дээх лот кыайыылааҕа буолбута. Ол түмүгэр, манна ахсынньыга Уһук Илиҥҥэ бастакынан “Агрокуб” диэн научнай-чинчийэр лаборатория аһыллыбыта. Бу күннэргэ тыа хаһаайыстыбатын миниистирэ Александр Атласов «Агрокуб» үлэтин-хамнаһын билистэ, иитэр-үөрэтэр кэлэктииби кытары көрүстэ.
—Биһиги интеллектуальнай партнербытын, Саха судаарыстыбаннай тыа хаһаайыстыбатын академиятын, кытары айымньылаахтык үлэлиибит, — диэн кэпсээтилэр агрооскуола учууталлара. — Үрдүк аграрнай үөрэх кыһата, научнай тэрилтэлэр уонна АПК тэрилтэлэрэ оскуоланы кытары биир ситиминэн үлэлээһиннэригэр инновационнай технологиялары киллэрии оҕолор билэр-көрөр баҕаларын күүһүрдэр итиэннэ уруок тас өттүгэр химия, биология, экология эйгэлэринэн араас уопуттары, эксперименнэри оҥорор кыаҕы биэрэр. Ону таһынан, толкуйдуур дьоҕурдарын күүһүрдэр, бырайыактары оҥорорго үөрэтэр, хамаанданан үлэлииргэ үөрэтэр.
«Агрокуб» үс хайысхалаах: биотехнология, агробиотехнология, робототехника. «Биотехнология» хайысхатыгар оҕолор Саха сирин отун-маһын, кыылын-сүөлүн үөрэтэллэр, микроклональнай ууһатыы үөрүйэхтэрин билсэллэр. «Агробиотехнологияҕа» вермокултуура уонна кунуһу, тобоҕу-ибэҕи таҥастааһын көмөтүнэн быйаҥнаах буору оҥорорго үөрэнэллэр. «Робототехника» хайысхатыгар агробокстар 3D макеттарын оҥорорго, тыа хаһаайыстыбатын үүнээйилэрин кэтээн көрөр автоматизацияламмыт ситими бырайыактыырга, айарга холоноллор. Быйылгы үөрэх дьылыгар 350 үөрэнээччи дьарыктаммыт: биотехнологияҕа — 90, агробиотехнологияҕа — 60, робототехникаҕа — 200.
Дьарыкка оҕолор тыа хаһаайыстыбатын аныгы технологияларын туһунан ылбыт сатабыллара кинилэр билиилэрэ-көрүүлэрэ хаҥыырыгар, научнай-чинчийэр лабораторияҕа үлэлииллэригэр тирэх буолар. Уопуттаах педагогтар салалталарынан кинилэр үүнээйини туһалаах эттиктэринэн хааччыйар суурадаһыннары оҥорорго, молекулалары диагностыыр, ДНК-ларын быһаарар ньымаларга уо.д.а. үөрэнэллэр. Инньэ гынан, “Агрокуб” тыа хаһаайыстыбатын салаатыгар интэриэһи тардар, идэҕэ туһаайар, аныгы кэм исписэлиистэрин бэлэмниир сүрүн соругун дьоһуннук толорор диэн тыа хаһаайыстыбатын министиэристибэтин пресс-киинэ иһитиннэрэр.
Раиса Сибирякова, «Саха сирэ» хаһыат, edersaas.ru
Хаартыскаҕа тыа хаһаайыстыбатын министиэристибэтин пресс-киин түһэриилэрэ.