Хаҥалас улууһугар “Нөмүгү агрофирмата” ХЭУо оҕо турбат ыалын курдук буолла. Алтынньы, сэтинньи ыйдарга хас да салайааччы уларыйда. Онон сиэттэрэн хаһаайыстыбаҕа үлэ-хамнас эмиэ сатарыйа сыста.
Яков Барабанов кэнниттэн б.дь. муус устарыгар дириэктэринэн Николай Федотов анаммыта. Кини агрофирманы эрдэ, 2011-2015 сылларга, эмиэ салайа сылдьыбыта. “Больничнайга сылдьар кэммэр устубуттара” диэн үҥсүһүөх курдук этэ эрээри, дириэктэр дуоһунаһыгар дураһыйбатын туһунан сайабылыанньа суруйан киллэрбит. Манна сыһыаран санаттахха, “нөмүгүлэр” собостуопкалаабыт биир сүрүн төрүөттэрэ Николай Федотовы ХЭУо генеральнай дириэктэрин дуоһунаһыгар төнүннэрии этэ…
Алтынньы бүтүүтэ дириэктэр эбээһинэһин толорооччунан анаммыт Денис Петрову үлэ кэлэктиибэ ылымматаҕа. Онтон собостуопка саҕана быстах кэмҥэ салайааччынан анаммыт, эрдэ Николай Федотовка солбуйааччынан сылдьыбыт Владимир Иванов эбээһинэһин толорбото. Онон бэҕэһээ, сэтинньи 12 күнүгэр, “Туймаада” ҮХАПХ АУо генеральнай дириэктэрэ Петр Ефремов мунньахтаан баран, “Нөмүгү” агрофирмаҕа салайааччынан Андрей Михайловы анаата.
Билбэт дьон “Туймаада” хампаанньа тоҕо ороосто дии саныахтарын сөп. Онон, быһааран эттэххэ, быйыл күһүн алтынньыга өрөспүүбүлүкэ бөдөҥ производственнай хаһаайыстыбалара — “Өлүөхүмэ кыладабыайа”, Хатастааҕы сибиинньэ комплекса, “Бөртө” сылгы собуота уонна “Нөмүгү агрофирмата ХЭУо-лар “Анаабыр алмаастара” хампаанньаттан “Туймаада” АУо үп-харчы агропромышленнай хампаанньатын бас билиитигэр бэриллибиттэрэ. Тэрийээччи-бас билээччи хаһаайыстыбаҕа салайааччыны бэйэтэ аныыр бырааптаах.
Андрей Викторович Михайлов Хаҥалас улууһугар биллэр киһи. Покровскайдааҕы уотурба собуотун салайа сылдьыбыта 2009 сыллаахха эстибитэ. Билигин “Ювеком” ХЭУо диэн тутуунан дьарыктанар дьоҕус тэрилтэлээх. Быйыл күһүн Нөмүгү нэһилиэгин баһылыгын дуоһунаһыгар быыбарга киирсэн кыайтарбыта. Наар хотторуулаах өттүгэр сылдьар салайааччы бу сырыыга, дьэ, хайаһар? Ситиһиини эрэ баҕарабыт.
Василий НИКИФОРОВ,
«Саха сирэ» хаһыат, edersaas.ru