“Аграрнай салааҕа оҥорон таһаарыы кээмэйин улаатыыта бэлиэтэнэр, сүрүннээн баалабайынан ыллахха, үүтү ыаһын үрдээбитин суотугар”, – диэн Егор Борисов СӨ Судаарыстыбаннай Мунньаҕар (Ил Түмэҥҥэ) уонна өрөспүүбүлүкэ уопсастыбаннаһыгар туһаайан Анал этиитигэр аграрнай салааҕа сыһыаннаан эттэ.
Бу салааҕа тиһиктээх үлэ тыа хаһаайыстыбатын сайыннарар туһунан өрөспүүбүлүкэ сокуонун ылыныы кэнниттэн саҕаламмытын бэлиэтээтэ. Сокуон балаһыанньаларын олоххо киллэриигэ Тыа хаһаайыстыбатын иһитиннэриинэн-сүбэнэн хааччыйар киин, “Сахаагроплем” уонна Сир департамена хат тэрилиннилэр. Тыа хаһаайыстыбатыгар биир кэлим реестр оҥоһулунна. Соҕотуопкалааччылар, өрөспүүбүлүкэ төрүт олохтоох норуоттарын үгэс буолбут хаһаайыстыбаннай үлэлэрин эбийиэктэрин кэрискэлэрэ чопчуланнылар. Кэпэрээссийэлэһиигэ, бородууксуйаны соҕотуопкалааһыҥҥа, салааны техническэй өттүнэн хааччыйыыга, дохуоту үрдэтиигэ болҕомто ууруллар буолла. АПК-ны каадырынан хааччыйыыны тупсарар туһуттан Ил Дархан тыа хаһаайыстыбатыгар каадыр бэлиитикэтин туһунан ыйааҕа тахсыбыта.
Маны сэргэ тыа хаһаайыстыбатын табаары оҥорооччуларын өйүүр туһалаах ньымалар (механизмнары) оннунан хаалларыахпыт диэн эбэн эттэ. Кэпсэтиигэ сүрүн болҕомто Арктикаҕа, өрөспүүбүлүкэ хотугу оройуоннарын кыһалҕаларыгар, аҕыйах ахсааннаах төрүт норуоттар айылҕаны үгэс буолбут дьарыктарыгар туһаныыларыгар сир-уот уо.д.а атын боппуруостарга уурулунна.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата