Аграрнай партия улуус уонна нэһилиэк таһымнаах дьокутааттара элбиир
Ахсынньы 19 күнүгэр Россия Аграрнай партиятын Саха сиринээҕи салаатын Сэбиэтин уочараттаах мунньаҕа буолан ааста. Мунньаҕы Сэбиэт бэрэссээдэтэлэ, Россия Аграрнай партиятын Киин Сэбиэтин чилиэнэ Александр Васильев салайан ыытта.
Мунньахха икки улахан боппуруоска сэргэх кэпсэтии таҕыста. 2018 сыл балаҕан ыйынааҕы элбэх өрүттээх быыбардарга партия кыттыытын уонна кэлэр 2019 сылга партия иннигэр турар соруктар тустарынан киэҥ ис хоһоонноох дакылааты ситэриилээх кэмитиэт салайааччыта Прокопий Старостин оҥордо. Прокопий Иннокентьевич партийнай тэрилтэлэр үлэлэрин сиһилии ырытта, партийнай үлэ итэҕэстэрин ыйан туран, тирээн турар соруктары чопчулаан биэрдэ. Бу боппуруоска Хаҥалас уонна Бүлүү олохтоох партийнай тэрилтэлэрин салайааччылара, Хаҥалас улууһунааҕы Мунньах бэрэссээдэтэлэ А.П.Антонов уонна Бүлүү техникумун дириэктэрэ И.И.Алексеев эбии иһитиннэриини оҥордулар.
Партия быыбарга, чуолаан, тыа сиригэр көхтөөхтүк кыттан, улуустардааҕы уонна нэһилиэктэрдээҕи мунньахтар дьокутааттарын кэккэтэ хаҥаата. Ол түмүгэр, тыа хаһаайыстыбатын үлэһиттэрин, тыа сирин олохтоохторун тыын боппуруостарын дьиҥнээхтик туруулаһан туруорсар партия дьокутааттара үлэлэрин куһаҕана суохтук саҕалаатылар. Бүлүү улууһун дьокутааттара кэлэр 2019 сыллааҕы бүддьүөккэ тыа хаһаайыстыбатыгар, тыа сирин олохтоохторун олоҕо-дьаһаҕа тупсуутугар хаһааҥҥытааҕар да элбэх үбү көрөрү ситистилэр. Мантан сиэттэрэн, тыа хаһаайыстыбатын үлэһит дьоно биһиги тыын боппуруостарбытын быһаарсар партия баар эбит диэн сэргээтилэр. Сэбиэт чилиэннэрэ партийнай үлэ туһунан киэҥ кэпсэтиини ыыттылар.
Иккис боппуруоһунан, Устаап ирдиирин курдук, икки сылга биирдэ ыытыллар улахан тэрээһини – отчуоттуур — быыбардыыр кэмпириэнсийэни тэрийэн ыытыы көрүлүннэ. 2019 сылга билигин үлэлии олорор салалта быыбарданар торумун бигэргэттилэр. Онон кэмпириэнсийэ түмүгүн күүтэбит.
Петр ЕГОРОВ, «Саха сирэ» хаһыат, edersaas.ru саайтка анаан.