Россия Аграрнай партиятын Саха сиринээҕи салаатын салалтата Дьокуускай куоракка өрөспүүбүлүкэ муниципальнай тэриллиилэрин баһылыктарын VII сийиэһигэр кэлэ сылдьар нэһилиэктэр баһылыктарыттан бэйэтин чилиэннэрин “төгүрүк остуолга” ыҥыран, “Аграрнай партия уонна тыа сирин инники кэскилэ” диэн тиэмэҕэ кэпсэтии ыытта. edersaas.ru
Саха сиринээҕи салаа бэрэссэдээтэлэ Александр Васильев партия ыытар үлэтин, быыбардар туох түмүктээх ааспыттарын, инники былаан уонна сыал-сорук тустарынан иһитиннэриитин тула киэҥник кэпсэттилэр. Ол курдук, тыа сиригэр дьон-сэргэ итэҕэлин ылан талыллыбыт баһылыктар үлэлэрин-хамнастарын билиһиннэрдилэр, санааларын этиннилэр, көрүүлэрин үллэһиннилэр. Кэпсэтии кыттыылаахтарын санаалара биир сыалга-сорукка түмүллэрэ кэпсэтии хаамыытыгар билиннэ: тыа сирэ сайдарыгар, дьон олоҕун уйгута тупсарыгар туһуланар. Ол инниттэн тыа сирин кэлимник сайыннарыыга боччумнаах үлэни тэрийии эрэйиллэрин өйдүүллэрин эттилэр.
Түмүккэ Үөһээ Бүлүү улууһун Тамалакаан нэһилиэгэр ааспыт күһүн баһылыгынан талыллыбыт Петр Иванов уонна Ньурба улууһун Хаҥалас нэһилиэгин баһылыга, эдэр киһи Тимур Мордовской Аграрнай партия кэккэтигэр киирдилэр. Онон тыа сирин интэриэһин туруулаһар партия сыччах нэһилиэктэр баһылыктарыттан турар бөлөҕө 11 киһилэннэ.
Василий НИКИФОРОВ, edersaas.ru