АГИКИ ректора РФ наукаҕа уонна үрдүк үөрэххэ миниистирин кытта быһа сибээскэ таҕыста
РФ наукаҕа уонна үрдүк үөрэххэ миниистирэ Валерий Фальков быһа сибээскэ тахсан, үрдүк үөрэх, наука систиэмэтигэр сыһыаннаах ыйытыыларга хоруйдаата.
Министиэристибэҕэ маннык хабааннаах тэрээһин аан маҥнайгытын ыытылынна. Биэрии министиэристибэ бэйэтин Ютуб-ханаалыгар тэрилиннэ. “Умники и умницы” биэриини ыытааччы Юрий Вяземскай модератордаата. Валерий Фальков икки чаас устата абитуриеннар, устудьуоннар, төрөппүттэр, преподавателлэр, үрдүк үөрэх кыһаларын салайааччыларын, ону тэҥэ эдэр итиэннэ уопуттаах учуонайдар ыйытыыларыгар хоруйдаата.
РФ наукаҕа уонна үрдүк үөрэххэ миниистирин сүрүн хоруйдарын маннык бөлөхтүөххэ сөп:
— Үрдүк үөрэх тэрилтэлэрин үлэһиттэрин социальнай бырааптарын туһунан
Преподавателлэр уонна университеттар, институттар атын да үлэһиттэрэ сарбыйыллыбаттар.
— Цифровой эбии үөрэхтээһин туһунан
Аныгы цифровой технологияны үөрэххэ туһаныыга преподавателлэр эбии үөрэхтээһини ааһыахтарын сөп.
— Үрдүк үөрэх кыһаларын өйүөхтэрэ
Үп-харчы өттүнэн уустук балаһыанньаҕа түбэспит бары үрдүк үөрэх тэрилтэлэрэ министиэристибэттэн номнуо бэс ыйыгар өйөбүл ылыахтара.
— Абитуриеннар тустарынан
Тутар хампаанньа быйыл дистанционнай ньыманан үлэлиэҕэ. Маныаха “электроннай подпись” ирдэммэт. Хааччахтааһын миэрэлэрэ уһуллубут эрэ эрэгийиэннэргэ үрдүк үөрэх тэрилтэлэригэр бэйэтигэр тиийэн (очно) туттарыахтара.
— Тас дойду устудьуоннарын туһунан
Хааччахтааһынан сибээстээн, саҥа үөрэх дьылыгар кыайан кэлэн үөрэнэр кыахтара суох устудьуоннарга, кыраныысса аһыллыар диэри ыраахтан олорон дистанционно үөрэнэллэригэр усулуобуйа олохтонуоҕа.
— Волонтер устудьуоннар магистратураҕа, ординатураҕа эбэтэр аспирантураҕа киирэллэригэр эбии баал көрүллүөҕэ.
— Устудьуоннары үлэнэн хааччыйыы бырагыраамата пандемия кэнниттэн эмиэ салҕаныаҕа.
— Эдэр учуонайдарга – дьиэ. Эдэр учуонайдарга олорор дьиэ быйылгы сэртипикээттэрэ бэлэмнэр. Сотору РФ Наукаҕа уонна үрдүк үөрэххэ министиэристибэтин сайтыгар испииһэги көрүөххэ сөп.
Култуура уонна искусство Арктикатааҕы судаарыстыбаннай институтун ректора Саргылаана Игнатьева миниистиртэн үөрэх сиэссийэтин туһунан ыйытта. Валерий Фальков, өскөтүн айар исписээлинэстэргэ түмүктүүр аттестацияны миэстэтигэр тиийэн туттарар кыаллыбат буоллаҕына, онлайн ыытар кыаҕы көрүөхпүт диэн эттэ. Саргылаана Семеновна айар үрдүк үөрэх кыһалара сүрүн дьиссипилиинэлэрин ыраахтан олорон (дистанционно) ыыталлара уустугун таарыйда. Холобур, актер эбэтэр хореограф, скульптор, худуоһунньук, вокалист кууруһун түмүктүүрүгэр айар сатабылын уонна маастарыстыбатын таһымын хайдах сыаналыахха сөбүй? Монитору кэтиир, эбиитин сибээс мөлтөх улууһа буоллаҕына бу олус уустук. АГИКИ ректорын ыйытыытын, миниистир хоруйун үгүс сонуну тарҕатар сириэстибэлэр быһа тардан сырдаттылар. Онон айар үрдүк үөрэх кыһаларын этиилэрин истэллэригэр, ылыналларыгар эрэл баар.
Култуура уонна искусство Арктикатааҕы судаарыстыбаннай институтугар абитуриеннартан докумуону бэс ыйын 19 күнүттэн туталлар. Быйыл институт 21 хайысхаҕа үөрэххэ ылар. Кэлэр үөрэх дьылыгар бүддьүөт миэстэтэ биллэ эбилиннэ. Бу туһунан сиһили http://agiki.ru АГИКИ сайтыгар билсиэххэ сөп.
АГИКИ пресс-сулууспата.