Култуура Сүрүн Уопсастыба Үөрэх уонна наука Эдэр саас

АГИКИ абитуриеннартан докумуону тутан саҕалаата

Бүгүҥҥүттэн, бэс ыйын 14 күнүттэн, Арктикатааҕы култуура уонна искусство судаарыстыбаннай института 2021-2022 үөрэх дьылыгар абитуриеннартан докумуону тутан саҕалаата. Инньэ гынан, Саха сиригэр быйылгы тутар хампаанньа үлэтин бастакынан астылар.

edersaas.ru

Бу күннэргэ СӨ Үөрэҕин уонна наукатын министиэристибэтин инстаграмынан буолан ааспыт быһа сибээс кэмигэр АГИКИ бастакы проректора Станислав Иванов: “Дойду бэрэсидьиэнэ, бырабыыталыстыбата өйөөн, Арктикатааҕы култуура уонна искусство судаарыстыбаннай институтугар иккис сылын абитуриеннар үөрэххэ киирэллэригэр улахан кыаҕы биэрэр. Ол курдук, иккис сылын элбэх миэстэ көрүллэр. Өскөтүн бу иннинэ барыта 50-60 бүддьүөт миэстэтин ылар эбит буоллаҕына, былырыыҥҥыттан 173 миэстэ, быйыл 160 миэстэ көрүлүннэ. Итинтэн 124 миэстэ — күнүскү үөрэххэ (очно), 36 миэстэ — кэтэхэтэн үөрэххэ (заочно). Бу Арассыыйа бүддьүөтүттэн көрүллэр миэстэлэр”, — диэн эттэ. Итиэннэ проректор саҥа хайысхалар аһыллыбыттарын иһитиннэрдэ.

Докумуону үс көрүҥүнэн туттарыахха сөп:

  1. Институт информационнай систиэмэтин нөҥүө электроннай көрүҥүнэн
  2. Судаарыстыбаннай өҥө порталыгар “Поступление в ВУЗ онлайн” суперсервис нөҥүө
  3. Буоста оператордарын нөҥүө.

Сиһилии Арктикатааҕы култуура уонна искусство судаарыстыбаннай институтун саайтыгар ыйыллыбыт сигэнэн киирэн http://agiki.ru/ билсиэххитин, докумуоҥҥутун ыытыаххытын, 8 (4112) 42-11-67 тутар хамыыһыйа төлөпүөнүнэн ыйыталаһыаххытын сөп.

Санатан эттэххэ, сарсыҥҥыттан – бэс ыйын 15 күнүттэн, Арктикатааҕы судаарыстыбаннай агротехнологическай университет (АГАТУ), бэс ыйын 20 күнүттэн Хотугулуу-Илиҥҥи федеральнай университет (ХИФУ), о.д.а. үрдүк, орто анал үөрэх кыһалара докумуону тутан саҕалыахтара.

Людмила ПОПОВА, “Саха сирэ” хаһыат, edersaas.ru

0
0