Режиссер, сценарист Алексей Амбросьев, ыам ыйын 3 күнүгэр, инстаграмҥа саҥа киинэ сценарийын суруйан түмүктээбитин иһитиннэрдэ.
“Агент Мамбо” киинэ көрөөччүгэ биир саамай сөбүлэммит дьоруойа True Pac (Альберт Ноговицын оонньуур) туһунан туспа спин-офф киинэ уһуллар буолбут. Манна кэпсэнэр устуоруйа өссө приквел буолар эбит, сүрүн киинэҕэ кэпсэммит быһылааннар буолуохтарын 3 сыл иннинээҕи кэмнэри хоһуйар хартыына. Киинэ сүрүн матыыба доҕордоһуу уонна биллэн турар, таптал туһунан. Жанра ыччат кэмиэдьийэтэ.
Ааптар этэринэн, “Агент Мамбо” тахсан көстөрүн кытта, бу киинэ дьоруойдарын туһунан саҥа киинэни устар санаа тута үөскээбит. Бэйэни хааччахтаныы эрэһиимэ бүттэҕинэ, киинэ устуутун саҕалыыр былааннаахтар. Ону таһынан, Алексей Амбросьев, бу приквелга, “Агент Мамбо” иккис чааһыгар сюжеты сайыннаран оҥорууга өссө ураты санаа баарын эттэ. Онон, барыта этэҥҥэ буоллаҕына, киинэ олох даҕаны уһаан-кэҥээн барыан сөп.
Егор Карпов, «Саха сирэ» хаһыат, edersaas.ru