Сарсын, атырдьах ыйын 18 күнүгэр, Арктикатааҕы агротехнологическай университекка (ДьГСХА) үөрэххэ туттарсар докумуону тутуу түмүктэнэр. Бу туһунан университет пресс-сулууспата иһитиннэрэр.
Бу үөрэх кыһатыгар туттарсыан баҕалаахтар докумуоннары түөрт ньыманан ыытыаххытын сөп:
— abiturient@agatu.ru электроннай аадырыска;
— agatu.ru саайтка «Личный кабинет абитуриента АГАТУ» нөҥүө;
— улуускутугар баар «Мои документы» киин нөҥүө;
— буостанан.
Приемнай хамыыһыйа үлэтин туһунан сиһилии www.agatu.ru саайка «Абитуриенту» диэн салааҕа ааҕыаххытын сөп.
Билсэр төлөпүөннэргит: +7(968)154-49-82, +7(4112)507-976.
Арассыыйа успуордун үтүөлээх маастара, Арассыыйа буоксаҕа үс төгүллээх чөмпүйүөнэ, Европа икки төгүллээх чөмпүйүөнэ, аан дойду чөмпүйэнээтин иккис призера, 2016 сыллааҕы Олимпиада кыттыылааҕа Василий Егоров АГАТУ-га үөрэххэ туттарсар.
«Агропромышленнай комплекс сайдыытын кытта олохторун ситимниир дьоҥҥо АГАТУ биир бастыҥ үөрэх кыһата буолар. Мин билиҥҥи кэмҥэ ыччат тыа сирин таларыттан, тыа хаһаайыстыбатын сайыннарарыттан киэн туттабын. Бу үөрэх кыһатын бүтэрбит дьон билигин ситиһиилээх фермердэр, олохтоох оҥорон таһаарыынан дьарыктанааччылар, экэнэмиистэр. Академия төрүттэммитэ 65 сылын көрсө университет статуһун ылла уонна саҥа көлүөнэ үүнэригэр-сайдарыгар олук буола турар«, — диэн боксер Василий Егоров санаатын үллэстэр.
edersaas.ru