Ил Дархан уонна СӨ Бырабыыталыстыбатын Дьаһалтатын салайааччыта Георгий Михайлов бүгүн Арктическай судаарыстыбаннай агротехнологическай университет ректорын эбээһинэһин толорооччу Валерий Федоровы кэлэктиипкэ билиһиннэрдэ.
АГАТУ саҥа салайааччытын аныыр туһунан РФ Тыа хаһаайыстыбатын министиэристибэтин бирикээһэ тохсунньу 25 күнүгэр тахсыбыта. Бу дуоһунаска ананыан иннинэ Валерий Федоров АГАТУ ректорын сүбэһитинэн үлэлээбитэ.
АГИП салайааччыта үрдүк дуоһунаска саҥа анаммыт салайааччы аныгы үйэҕэ өрөспүүбүлүкэ агргарнай салаатыгар үрдүк таһымнаах исписэлиистэр үүнэн-сайдан тахсыахтарыгар эрэнэрин биллэрдэ. Оттон Валерий Федоров университет үлэтин сонун хайысхаларга туһаайарыгар, үөрэхтээһин сонун бырайыактарын олоххо киллэрэргэ тирээн турар соругу бэлиэтээтэ.
«Саха сирэ «хаһыат суруналыыстара Валерий Федоровы кытта үгүстүк командировкаларга сылдьыбыппыт. Өрөспүүбүлүкэ улуустарын устун үгүстүк айаннаабыт уопуттаах салайааччыга ситиһиилэри баҕарабыт.
Елена ПОТОЦКАЯ, “Саха сирэ” хаһыат, edersaas.ru
Хаартыска: Мария Васильева, СИА.