От ыйын 20-22 күннэригэр Горнай улууһугар Күөрэлээххэ ойуур баһаарын умуруорууга АГАТУ этэрээтэ үлэлээтэ.
Санатан эттэххэ, бу этэрээти АГАТУ үлэһиттэрэ уонна устудьуоннара бэйэлэрин баҕаларынан тэрийбиттэрэ. Манна барыта 32 киһи киирбитэ. Этэрээти быстах кэмҥэ ректоры солбуйааччы Константин Кривошапкин салайар.
Үөрэх кыһата тырааныспарынан, хас да күннээх аһынан-үөлүнэн, ГСМ, бэйэ туһанар сириэстибэлэринэн (респиратордарынан, мааскаларынан, анал ачыкыларынан), күрдьэхтэринэн, эрбиинэн, сүгэлэринэн уонна да атын туттуллар үстүрүмүөннэринэн хааччыйбыта.
АГАТУ этэрээтэ Лесхоз хамаандатын кытта Күөрэлээх сэлиэнньэтин таһыгар баар улахан баһаары тохтоттулар. Үс күн устатыгар минерализованнай балаһаны ыраастаатылар, кэнники күҥҥэ нэһилиэнньэлээх пуунтан 7 км сиргэ уоту умуруорууга үлэлээтилэр.
«Бу күннэр усталарыгар биһиги Күөрэлээхтэн чугас сытар гаас ситимин устатынан 10 км ордук сири ыраастаатыбыт. Итинэн ойуур баһаара тарҕаныытын уонна нэһилиэнньэлээх пууҥҥа чугаһыырын боҕустубут», — диэн устудьуоннар 1 №-дээх дьиэлэрин сэбиэдиссэйэ, доброволец Петр Кузьмин эттэ.
АГАТУ биригээдэтин медиктэр, университет үлэһиттэриттэн радиосибээс исписэлиистэрэ арыаллаатылар. Маны сэргэ, үлэһиттэр кэлэр сылларга чөлүгэр түһэриллиэхтээх сири-уоту наука өттүнэн көрдүлэр.
«Түүн ойуурга сылдьар кутталлаах. Хойуу буруоттан уонна борук-сорук буолан, мас сууллара көстүбэт. Үс мас тэҥинэн сууллубута. Хата, туора ыстана охсоммут, этэҥҥэ туох да эчэйиитэ суох буолла», — диэн Василий Домотов этэр.
Билигин Горнай улууһугар ойуур баһаардарын умуруорууга үлэ тохтоло суох ыытыллар, миэстэтигэр Дьокуускайтан тиийбит саҥа биригээдэ үлэлии сылдьар. Санатан эттэххэ, ойуур баһаардарын умуруорууга туох баар күүс барыта туһаайыллар. Хас күн ахсын уоту утары охсуһарга бэйэлэрин баҕаларынан тиийбит дьон күүстэрин харыстаабакка сыралаһаллар.
+1
+1
+1
+1
+1
+1
+1