Тыа хаһаайыстыбата Уопсастыба Үөрэх уонна наука Эдэр саас

АГАТУ докумуону бэс ыйын 15 күнүттэн тутар



Арктикатааҕы судаарыстыбаннай агротехнологическай университет киин тутар хамыыһыйатыгар иһитиннэрбиттэринэн, быйыл докумуону бэс ыйын 15 күнүттэн тутан саҕалыыллар.

edersaas.ru

СӨ үөрэҕин уонна наукатын миниистирин бастакы солбуйааччы Михаил Присяжнай уонна Арктикатааҕы судаарыстыбаннай агротехнологическай университет киин тутар хамыыһыйатын начаалынньыга Павлина Васильева, университет орто анал үөрэххэ кэллиэһин дириэктэрин солбуйааччы Юлия Чиркова быһа сибээскэ тахсан, абитуриеннар, төрөппүттэр ыйытыыларыгар хоруйдаатылар.

АГАТУ быйыл 48 үрдүк (бакалавриат, специалитет, магистратура, аспирантура) үөрэх бырагыраамаларыгар уонна орто анал үөрэхтэргэ  ылар былааннаах.

Пандемиянан сибээстээн былырыыҥҥыттан докумуону тутууга уларыйыылар киирбиттэрэ. Ол курдук, ыраахтан олорон (дистанционно) туттарыы көрүҥэ баар буолбута. Ону тэҥэ, университекка бэйэтигэр кэлэн, быйылгыттан Судаарыстыбаннай өҥө порталын нөҥүө (Поступление в ВУЗ онлайн супер-сервиһинэн) туттарыахха сөп.

Үрдүк үөрэххэ киирэргэ биир кэлим эксээмэн (ЕГЭ) баала ирдэнэрин бары билэҕит. БКЭ баала биэс сыл устата дьайар. Ол эбэтэр, 2017 сылтан бэттэх эксээмэн баалларынан киириэххэ сөп. Докумуону бэс ыйын 15 күнүттэн ылабыт”, — диэн киин тутар хамыыһыйа начаалынньыга Павлина Васильева иһитиннэрдэ.

АГАТУ тыа хаһаайыстыбатын хайысхатыгар эрэ буолбакка, ойуур хаһаайыстыбатыгар, олох-дьаһах хомунаалынай хаһаайыстыбатыгар, АйТи, экэниэмикэ идэлэригэр бэлэмниир. Былырыын үөрэххэ киирии орто баала 60-ҥа тэҥнэспит.

Быйыл АГАТУга 903 бүддьүөт миэстэтэ көрүлүннэ. Итинтэн 773 миэстэ — үрдүк үөрэххэ, 130 миэстэ – орто анал үөрэххэ. Үрдүк үөрэххэ 112 тус сыаллаах (целевой) миэстэ бэрилиннэ”, — диэн начаалынньык иһитиннэрдэ.

Арктикатааҕы судаарыстыбаннай агротехнологическай университет иһинэн Технология уонна управления кэллиэһэ үс сыл ситиһиилээхтик үлэлээтэ. Кэллиэс дириэктэрин солбуйааччы Юлия Чиркова:Быйыл үһүс сылын 9-с кылаас кэнниттэн оҕолору үөрэххэ ылабыт. Абитуриеннар “экэниэмикэ уонна буҕаалтыр учуота” (2 сыл 10 ый үөрэнэллэр), “быраап уонна социальнай хааччыйыыны тэрийии” (2 сыл 10 ый үөрэнэллэр), “информационнай систиэмэлэр уонна бырагыраамалааһын” (3 сыл 10 ый үөрэнэллэр), “повар уонна кондитер дьыалата” (3 сыл 10 ый үөрэнэллэр) идэлэргэ туттарсыахтарын сөп. Тустаах идэлэргэ үөрэх төлөбүрдээх, сылга 80 тыһыынча солкуобайга тэҥнэһэр.

11-с кылаас кэнниттэн эмиэ 4 идэҕэ бэлэмниибит. Ол курдук, “быраап уонна социальнай хааччыйыы” (1 сыл 10 ый), “экэниэмикэ уонна буҕаалтыр учуота” (1 сыл 10 ый), “зоотехния” (2 сыл 10 ый), “теплоснабжение уонна теплотиэхиньиическэй оборудование” (2 сыл 10 ый).

Кэллиэскэ сэһэргэһии уонна аттестат орто баалынан ылабыт. Орто баал – 4 тэҥнэһэр. Сыллата баал уларыйа турар. Бу хайдах бэлэмнээх абитуриеннар кэлэллэриттэн тутулуктаах”, — диэн билиһиннэрдэ.

Биир кэлим эксээмэн (ЕГЭ) түмүгүнэн киирээччилэртэн от ыйын 29 күнүгэр диэри, орто үөрэх дипломунан туттарсааччылартан от ыйын 15 күнүгэр диэри докумуоннары туталлар. От ыйын 16 күнүттэн олоҕурбут (очно) уонна ыраахтан олорон (дистанционно) университет бэйэтэ ыытар эксээмэннэрэ (вступительные испытания) саҕаланыахтара диэн эттилэр.

 

Людмила ПОПОВА. “Саха сирэ” хаһыат, edersaas.ru

0
0