Быйыл Туймаада ыһыаҕа онлайн-эрэсииминэн ыытыллар буолла. Дьокуускай куорат салалтата 75-тэн аҕа саастаах дьоҥҥо бэлэх биэрэр туһунан быһаарыыны ылынна.
edersaas.ru
Бакыат иһигэр олохтоох оҥорон таһаарыы табаардара — алаадьы оҥорорго бородуукта нобуора, арчыланыы сиэрин-туомун толорор маллар, саха чэйэ уонна “Киин куорат”, “Эхо столицы” хаһыаттар ыһыахха анаммыт нүөмэрдэрэ бааллар.
— Үгэс курдук, ыһыаҕы аҕам саастаахтар ордук күүтэллэр, кэтэһэллэр. Улуу Кыайыы саастыылаахтарын, сэрии оҕолорун, тыыл бэтэрээннэрин үөрдэр, болҕомтобутун уурар туһуттан, бу сэмэй бэлэхпитин бэлэмнээтибит. Ыһыах төһө да онлайн ыытыллар буоллар, суолтатын сүтэрбэт. Саха норуотун түҥ былыргыттан илдьэ кэлбит бырааһынньыгын дьиҥнээх күүһэ – алгыска, Айыыларга сүгүрүйүүгэ, айылҕалыын алтыһыыга, санаабытын бииргэ түмүүгэ, — диэн куорат баһылыга Сардаана Авксентьева кэпсээтэ.
Маннык бэлэхтэри 8,5 тыһыынчаттан тахса киһи ылыаҕа. Уокуруктар управлениелара бакыаттары номнуо түҥэтэлээн эрэллэр. Буоларын курдук, бары харыстанар ньымалары тутуһаллар.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн.