Аҕаларын 100 сылыгар — илии үлэтин күрэһэ

Ааптар: 
Бөлөххө киир:

Бу күннэргэ Өймөкөөн улууһугар олус кэрэхсэбиллээх тэрээһин буолан ааста.
Өймөкөөн нэһилиэгин ытык олохтооҕо, үлэ уонна тыыл бэтэрээнэ Захар Винокуров 100 сылын көрсө оҕолоро, сиэннэрэ уонна чугас аймахтара мустан, «Үлэ киһини киэргэтэр» диэн бэртээхэй илии үлэтин күрэһин тэрийдилэр.

Кыттааччылар хотуурунан от оҕустулар, ынах ыан күрэстэстилэр. «Өймөкөөн» сопхуос кадровай булчута Захар Семенович кэргэнинээн Евдокия Семеновналыын Үрдүк Айыылартан сакаастаабыт курдук 6 кыыс, 6 уол — 12 оҕоҕо күн сирин көрдөрөн, дьоллоох олоҕу олорон ааспыттара. Аҕаларын, эһэлэрин, хос эһэлэрин кэриэстээн Захар Винокуров ыччаттара түҥ сахалыы үгэһи салгыыр соруктаах үлэ күрэһинэн ытык киһилэрин кэриэстээтилэр. Кинилэргэ Өймөкөөн улууһун уонна нэһилиэк дьаһалталара көмөлөстүлэр.

Күрэхтэһээччилэргэ маннык ирдэбил турда: от охсуутугар – балыыһаттан ыспыраапка, илии хотуура, маҥан эбэтэр сырдык өҥнөөх ырбаахы, былаат, саппыкы. Ынах ыаһыныгар — балыыhаттан ыспыраапка, маҥан эбэтэр сырдык өҥнөөх ырбаахы, былаат, саппыкы.

Күрэскэ ыччаттар хото кыттыыны ыллылар. Бу күн хотуулаахтык от оттонно, дэлэй үүт ыанна.
Быйыл Өймөкөөн улууһугар 1-кы гильдиялаах меценат-атыыһыт Николай Кривошапкин төрөөбүтэ 185 сылыгар анаан «Үтүө дьыала сыла» биллэриллибитэ. Онон Захар Винокуров сыдьааннара ытык киһилэрин кэриэстээн, Үтүө дьыала сылыгар улахан тэрээһини ыыттылар.

Бу курдук улуус аайы Аҕаны уонна Ийэни кэриэстээн, үлэҕэ туһуламмыт тэрээһиннэри ыытыыга Өймөкөөн Винокуровтара бастыҥ холобуру көрдөрдүлэр.

Елена ПОТОЦКАЯ, «Саха сирэ» хаһыат.

+1
0
+1
0
+1
0
+1
0
+1
0
+1
0
+1
0