Билигин төһө даҕаны тохсунньу торулуур тымныыта турдар, кэлэр ыйтан оҕуруотчут түбүктээх кэмэ – уһуннук ситэр үүнээйилэр арассаадаларын олордуу саҕаланыаҕа.
edersaas.ru
Ону көрсө хаһаайкаларга Ньурба Антоновкатын олохтооҕо Агафья Тарасова маннык сүбэлиир:
—Сотору уһуннук ситэр култууралар: дьэдьэн (клубника) уонна сибэккилэртэн шток-роза, эустома, петуния, дельфиниум арассаадаланар кэмнэрэ саҕаланыаҕа. Онон таһырдьаттан буоргутун киллэрэн ириэрэн оҥоро, арассааданы олордор иһиттэргитин (“Доширак” диэн түргэн лапса иһитин, пенопласт дьааһыктары, сиэмэни муохха тылыннараачылар муоҕу, торфалаах таблеткаҕа олордооччулар торфалаах таблетканы о.д.а.) бэлэмнии сылдьаргытыгар сүбэлиибин. Эмтиир-сэрэтэр дьаһаллары тэрийэргэ марганцовканы, ампулалаах НВ 100 убаҕас эми хааччыныҥ. Даҕатан эттэххэ, торфалаах таблетканы үлүннэрэн, икки гына аҥардаан туһаныахха итиэннэ кэлин, үнүгэһи атын иһиккэ көһөрдөххө, куурдан-хатаран, бытарытан буорга эбиэххэ сөп.
Дельфиниум сиэмэтэ
Олордорго былаанныыр култуураларгыт сиэмэтин билигин дьиэҕэ туруорар буоллаххытына, стратификациялааҥ, ол эбэтэр тымныыны тулуйа үөрэтиҥ: таһырдьа таһааран, хаар анныгар быраҕыҥ. Холобур, мин күһүн атыыласпыт элбэх сыллаах үүнээйилэрим сиэмэтин бакыакка суулаан таһырдьа уурбутум бэртээхэй тургутууну бардылар. Олорбун олордорум саҕана дьиэҕэ киллэриэм.
Дельфиниум сиэмэтин буорга олордон баран, холодильникка ууруллар
Дельфиниум сиэмэтин атыылаһаргытыгар болдьоҕун көрүҥ: алта ыйтан ордук сыппыт сиэмэ хатан хаалар. Уопсайынан, сиэмэ элбэх көрүҥэ (луукайкалаахтар, элбэх сыллаах үүнээйилэр уонна дельфиниум сиэмэлэрэ) сөбүгэр сөрүүн температураҕа харайыллыахтаахтар. Бу ирдэбили үгүс маҕаһыыннар тутуспаттар. Ол түмүгэр, атыылаһыллыбыт сиэмэ сороҕо тахсааччыта суох. Ити иһин дельфиниум сиэмэтин болдьоҕо алта ыйтан тахса илик буоллаҕына, тута холодильникка ууран, тахсар кэмин баттаһыахха сөп. Аны олордор саҕана тымныы буорга олордон баран, холодильникка сытыара түһүллэр.
Раиса СИБИРЯКОВА, «Саха сирэ» хаһыат, edersaas.ru