Бүлүү улууһунааҕы Аҕа сүбэтэ кулун тутар 29 күнүгэр Дьаам күөлэ диэн сиргэ 10 уолу куйуурдуурга үөрэттилэр. Бу тэрээһин “Аҕа үөрэҕэ” диэн бырайыак чэрчитинэн ыытылынна.
Уолаттар балыктыыр сэби-сэбиргэли кытта билистилэр, сатаан туттарга, ойбон алларарга үөрэннилэр, сааскы куйуурдааһын кистэлэҥнэрин биллилэр. Кинилэргэ араас күрэстэри ыыттылар. Саамай элбэх уонна саамай улахан балыктаах, түргэнник туттунан, аан бастакынан балыгы хостообут оҕолор наҕараадаланнылар.
Онон куйуурдуурга үөрэммит уолаттар сааскы салгыҥҥа сылдьан, бириэмэлэрин туһалаахтык атаардылар, үөрэн-көтөн, илии тутуурдаах, өттүк харалаах тарҕастылар. Кинилэр инники олохторугар бу ылбыт үөрүйэхтэрэ туһалаах буолара саарбаҕа суох.
Маны тэҥэ, Бүлүүтээҕи саастарын ситэ оҕолору социальнай-реабилитациялыыр киин 15 үөрэнээччини сааскы каникулларыгар аралдьыттылар. “Дьиктилээх түгэннэр” бырайыак чэрчитинэн, араас тэрээһиннэргэ сырытыннардылар.
Уон күн иһигэр оҕолор “Хомустаах” муус куоракка, мусуойга, бибилэтиэкэҕэ, “Кэскил” интеллектуальнай-айар киин дьарыктарыгар, киинэ тыйаатырыгар сырыттылар, тыйаатырга оонньоон, үөрэнэн көрдүлэр. Оттон куоракка ыытылыллыбыт сааскы “Масленица” бырааһынньыгар «Царица-Несмеяна» остуоруйаны туруоран көрдөрдүлэр, ыалдьыттары билиинчигинэн, сушкаларынан күндүлээтилэр.
Бииргэ сылдьан, билсэн-көрсөн, ыраас салгыҥҥа оонньоон-көрүлээн, эбии билии ылан, элбэххэ үөрэнэн, оҕолор каникулларын туһалаахтык атаардылар.
Ангелина Васильева, “Саха сирэ” хаһыат, edersaas.ru