Бүгүн Саха сиригэр эйэлээх кэмҥэ Ийэ дойду көмүскэлигэр сэриигэ сылдьан олохторун толук уурбут интернационалист-буойуннары кэриэстээтилэр.
— Бүгүн интернационалист-буойуннар Дьокуускай куоракка Афганистантан Сэбиэскэй сэриилэри таһаарыы 33 сылын бэлиэтиир өйдөбүнньүк күн Тыа хаһаайыстыбатын техникумугар буойун-интенационалист Владимир Калашников, Арассыыйа Дьоруойа искибиэригэр баар Александр Рыжиков, Кыайыы боолуоссатыгар “Георгий Победоносец” чочуобунатыгар бойобуой дьайыылар бэтэрээннэрин пааматынньыктарыгар тыыннаах сибэкки дьөрбөтүн уурдулар. Афганистан сэриитин инбэлииттэрин дьиэлэригэр сылдьан көрүстүлэр. Онтон интернационалист-буойуннар кылаабыһаларыгар сырыттылар.
Бу чааска буойун-интернационалистар, Афганистан сэриитин бэтэрээннэрэ куйаар ситиминэн былаас уорганнарын, уопсастыбаннай тэрилтэлэри, байыаннай комиссариаттар үлэһиттэрин, юнармеецтары кытта кэпсэтиилэрэ буола турар, — диэн Арассыыйатааҕы “спецназ” бэтэрээнэ, “Эр санаа” уонна “Бойобуой сырыыларын иһин” уордьаннар кавалердара, өрөспүүбүлүкэтээҕи “Өйдөбүнньүк” уопсастыбаннай тэрилтэ салайааччыта, СӨ норуотун хаһаайыстыбатын үтүөлээх үлэһитэ, «Время выбрало их…» уонна «Симэлийбэт суол» үстүү туомнаах кинигэлэр ааптардара, Уус Алдан улууһун Бочуоттаах олохтооҕо Иван Черкашин кэпсээтэ. Иван Петрович эйэлээх кэмҥэ сэриигэ сылдьыбыт бэтэрээннэр өрөспүүбүлүкэтээҕи уопсастыбаннай тэрилтэлэрин иһинэн өрөспүүбүлүкэ улуустарыгар үгүс өрүттээх үлэни ыытар. Кини иһитиннэрбитинэн, бүгүн Ленскэй куоракка эйэлээх кэмҥэ сэриигэ сылдьыбыт буойун-интернационлистары ахтан-санаан аастылар.
Елена ПОТОЦКАЯ, “Саха сирэ” хаһыат, edersaas.ru