Бэҕэһээ Афганистан Өрөспүүбүлүкэтэ норуоттар икки ардыларынааҕы мас тардыһыы бэдэрээссийэтигэр чилиэн быһыытынан киирэргэ сайаапка түһэрдэ.
Афганистан олимпийскай кэмитиэтин бэрэссэдээтэлэ 2016 сыллаахха VI норуоттар икки ардыларынааҕы «Азия оҕолоро» оонньууларга Дьокуускайга кэлэ сылдьан, мас тардыһыытын сэргии көрбүт. Норуоттар икки ардыларынааҕы мас тардыһыы бэдэрээссийэтигэр Афганистаны киллэрэр соруктаах сурук ыыппыт. Сайаапканы ылыннахтарына, Афганистан мас тардыһыыга бэдэрээссийэтин Шукрулла Фазили салайара быһаарыллыбыт.
Санатан эттэххэ, норуоттар икки ардыларынааҕы мас тардыһыы бэдэрээссийэтигэр киирэри президиум мунньаҕар аһаҕас куоластааһынынан быһаараллар. Бэдэрээссийэ мунньаҕа сэтинньи 23 күнүгэр мас тардыһыытыгар III Аан дойду чөмпүйэнээтэ Дьокуускайга буола турдаҕына ыытыллыаҕа.
Николай Попов, «Саха сирэ» хаһыат, edersaas.ru