Мэҥэ Хаҥалас улууһугар Афганистан сэриитигэр кыттыбыт түөрт, Чечняҕа бойобуой дьайыыларга сылдьыбыт сэттэ уонча бэтэрээн олорор. Соторутааҕыта кинилэри түмэр, олохторугар-дьаһахтарыгар күүс- көмө, сүбэ-ама буолар соруктаах “Доблесть” түмсүү тэрилиннэ.Ону бойобуой дьайыылар бэтэрээннэрэ, улуустааҕы үөрэх управлениетын исписэлииһэ Николай Семенов салайар.
Наахараттан Аллараа Бэстээхтэн, Мэлдьэхситтэн, Табаҕаттан, Майаттан, Сыымахтан, Хорообуттан, Тумултан эдэр саастарыгар сэрии ыар тыынын эттэринэн-хааннарынан билбит уон түөрт уол Россия спецнаһын бэтэрээнэ, «Мужество» уордьан кавалера Иван Черкашины, Мэҥэ Хаҥалас, Уус Алдан оройуоннарын байыаннай комиссардара Айаал Петровы кытта “төгүрүк остуол” тула олорон сэһэргэстэ, санаа үллэһиннэ. Көрсүһүүнү бэтэрээннэр улуустааҕы сэбиэттэрин бэрэссэдээтэлэ Маргарита Максимова иилээн-саҕалаан ыытта.
Улуус социальнай харалтаҕа управлениетын начаалынньыга Иван Шестаков бойобуой дьайыылар бэтэрээннэригэр ханнык социальнай көмөлөр баалларын билиһиннэрдэ, ыччаты патриоттуу иитиигэ бэйэлэринэн холобур буоларга ыҥырда. Татьяна Артемьева түмсүү кыттыылаахтарыгар туһаайан улууспутуттан бойобуой дьайыы кыттыылаахтарын ахсааннарын өссө чуолкайдаһан, кинилэр тустарынан кинигэ таһаартарар санаалааҕын иһитиннэрдэ.
Көрсүһүү Дмитрий Ходулов аатынан тыйаатыр сценатыгар салҕанна. Баатаратааҕы кадет кылааһын үөрэнээччилэрэ буойуннары чиэстээтилэр.
Бу күн Дьокуускайтан Үүнэр көлүөнэ тыйаатырын артыыстара (салайааччы Алексей Павлов) Афганистан, Чечня сэриилэригэр кыттыбыт уолаттар дьылҕаларын туһунан кэпсиир «Симэлийбэт суол» испэктээк көрдөрдүлэр. Испэктээк ааптара ‒ Иван Черкашин. Кини «Мужество» уордьан кавалера, Россия спецнаһын бэтэрээнэ, бойобуой дьайыы кыттыылаахтарын үйэтитэр хас да кинигэ-альбому таһаартарбыта. Испэктээги режиссер Александр Титигиров туруорда. Дьиэ кэргэн, ыччат управлениетын кылаабынай исписэлииһэ Павел Судико Иван Петровичка улуус салалтатын аатыттан эҕэрдэтин тириэртэ.
Иван Черкашин бойобуой дьайыылар бэтэрээннэрин, сэриигэ өлбүт байыаннайдар, быраабы араҥаччылыыр уорганнар үлэһиттэрин төрөппүттэрин сойуустарын аатыттан Махтал суруктары оройуон баһылыгын бастакы солбуйааччы Павел Сазоновка, «Доблесть» уопсастыбаннай түмсүү бэрэссэдээтэлэ Николай Семеновка, Афганистан сэриитин бэтэрээнэ Валерий Саввиҥҥа туттартаата.
‒ Бастатан туран, испэктээги көрө кэлбиккитигэр махтанабын. Дьоруойдар сэриигэ эрэ баар буолбатахтар, дьиҥнээх дьоруой дьон эһиги таскытыгар бааллар. Ханна эрэ ыраах омук киинэлэригэр уһуллубут дьоруойдары көрө сатаамаҥ. Бүгүн кэлбит уолаттар да бигэргэтиэхтэрэ, биһиги Саха сиригэр олус үчүгэй, эйэлээх олоххо олоробут. Куораттар, сэлиэнньэлэр атааннаһыыттан хайдах курдук урусхалламмыттарын, дьон олоҕо сатарыйарын, ийэ оҕотун сүтэрэн ытыырын көрбүт уолаттар кинилэр буоллахтара. Буойуттары ыччаттаргытыгар чугаһатыҥ, кинилэртэн холобурда ылыҥ диэн ыҥырабын, ‒ диэтэ Иван Петрович.
Афганистан, Чечня сэриилэрин саха уолаттарын харахтарынан арыйар испэктээк өрөспүүбүлүкэҕэ, Россияҕа даҕаны, бастакытын туруоруллубутун ааптар Иван Черкашин бэлиэтиир.
Марфа Птицына.