Афанасий Владимиров Алдан уонна Ленскэй оперативнай ыстааптарын кытта мунньахтаата
Ил Дархан уонна Бырабыыталыстыба Дьаһалтатын салайааччыта Афанасий Владимиров видео-сибээһинэн Алдан уонна Ленскэй оройуоннарын оперативнай ыстааптарын кытта уочараттаах мунньаҕы ыытта.
edresaas.ru
Афанасий Владимиров коронавирус дьаҥа турар куттала суоһаан, Алдан улууһугар карантин биллэриллибитин курдук, өскө Ленскэй улууһугар итинник хабааннаах сибики билиннэҕинэ, бу оройуоҥҥа эмиэ тустаах дьаһал ылыллыаҕын туһунан бэлиэтээтэ.
— Муниципальнай тэриллиилэр баһылыктара, олох эппиэтинэстээх буоларгыт эрэйиллэр. Бары уустук боппуруостары өрөспүүбүлүкэтээҕи оперативнай ыстаапка уонна тустаах сулууспаларга тута биллэрэ олоруҥ. Бары кыаллар көмөнү оҥоруохпут, — диэн ыҥырда салайааччы.
Афанасий Владимиров элбэх кыбартыыралаах дьиэлэргэ, обсерватордарга санитарнай дезинфекцияны ыытыыны күүһүрдэргэ, медицинскэй персоналы, быраабы араҥаччылыыр уорганнар, Роспотребнадзор уонна дьону кытта алтыһар үлэлээх дьону харыстанар тэриллэринэн хааччыйарга сорудахтаата. «Итии линиялар» уонна волонтердардары кытта үлэ сибээстэрин күүһүрдэргэ санаатын тиэртэ.
Ил Дархан уонна Бырабыыталыстыба Дьаһалтатын салайааччы сотору кэминэн өрөспүүбүлүкэтээҕи Роспотребнадзор сотрудниктара хантаахтаах дьону кэтээн көрүүгэ уонна муниципалитеттар сирдэригэр-уоттарыгар дьиэҕэ олоруу эрэсиимин тутуһарга туһуламмыт үлэни ыытар исписэлиистэри миэстэтигэр тиийэн үөрэхтиэхтэрин туһунан иһитиннэрдэ.
Елена ПОТОЦКАЯ, «Саха сирэ» хаһыат, edersaas.ru
Хаартыска – Мария Васильева.