Маны аах Уопсастыба

Афанасий Владимиров: «Өрөспүүбүлүкэ олохтоохторун санаалара учуоттаныахтаах»

СӨ Ил Дархан уонна Бырабыыталыстыба дьаһалтатын салайар, Конституционнай хамыыһыйа чилиэнэ Афанасий Владимиров «Парламентский вестник» биэриигэ, Ил Дархан Айсен Николаев Ил Түмэн көрүүтүгэр СӨ Төрүт сокуонугар көннөрүүлэри уонна эбиилэри киллэрэр конституционнай сокуон барылын оҥорон киллэрбитин  сырдатарыгар, олохтоохтор санаалара хайаан да учуоттаныахтааҕын эттэ. Маны сэргэ, кини тирээн турар ыйытыыларга тохтоото диэн СИА иһитиннэрэр.

СӨ Ил Түмэн көрүүтүгэр 2021 сыл муус устар 30 күнүгэр СӨ Ил Дархана Айсен Николаев тустаан  гражданнар социальнай бырааптарын мэктиэлэрин,  дьиэ кэргэн уонна оҕо аймах, үөрэхтээһин уонна доруобуйа харыстабылын боппуруостарын хааччыйарга СӨ Төрүт сокуонугар көннөрүүлэри уонна эбиилэри киллэрэр туһунан конституционнай сокуон барылын  килэрбитэ.

Афанасий Владимиров бэлиэтээбитинэн, Бүтүн Арассыыйатааҕы куоластааһын кэнниттэн Саха Өрөспүүбүлүкэтигэр анал үлэлиир бөлөх тэриллибит. Манна  федеральнай, өрөспүүбүлүкэтээҕи толорор былаас органнарын бэрэстэбиитэллэрэ, өрөспүүбүлүкэ парламеныттан, Саха сирин биир идэлээх сойуустарн федерациятыттан, Бүтүн Арассыыйатааҕы норуот фронуттан, ону сэргэ олохтоох бэйэни салайыныы органнарыттан бэрэстэбиитэллэр киирбиттэр.

«Анал бөлөх үс хайысханан үлэлээтэ. Бастакы уочарат — нэһилиэнньэни социальнай өттүнэн көмүскэллээх буолуутун хааччыйыы, дьиэ кэргэн уонна оҕо аймах институттарын өйөөһүн, доруобуйа харыстабыла. Иккискэ — үөрэхтээһин, науки, култуура боппуруостара. Үсүһүнэн — судаарыстыбаннай салайыы, муниципальнай былаас туһунан боппуруостар. Биһигини кытта бииргэ научнай холбоһук бэрэстэбиитэллэрэ үлэлээтилэр», — диэн кэпсээтэ Владимиров.

Кини этиилэри оҥорууга бастакыттан норуот дьокутааттара көхтөөхтүһк ылсыбыттарын бэлиэтээтэ. Биир хос бөлөҕү Алексей Еремеев салайбыт. Социальнай блок бөлөҕөр кэмитиэттэри салайар Феодосия Габышева, Владимир Чичигинаров, Алена Атласова үлэлэспиттэр.

«Дьүүллэһии көхтөөхтүк салҕанар. Конституционнай сокуоҥҥа, бырайыакка киллэриллибит дьокутааттар этиилэрэ учуоттанар», — диэн эттэ.

Афанасий Владимиров Саха сирин олохтоохторун санаалара хайаан да учуоттаныыллыахтааҕын тоһоҕолоото уонна билиҥҥи кэмҥэ прокурору анааһын боппуруоһа уонна субъектар конституционнай сууттарын тохтотуу туһунан боппуруостары  дьүүллэһии бара турарын эттэ.

«Бүгүн биһиги өрөспүүбүлүкэ олохтоохторун санааларын учуоттуур бириинсиби тутуһан иһэбит. Биллэн турар, социальнай мэктиэ, дьиэ кэргэн уонна оҕо аймах институттарын өйөөһүн, доруобуйа харыстабылын сайыннарыы, үөрэх, наука, култуура боппуруостарыгар бүттүүн уонна толору уларыйыылары нэһилиэнньэ ылынарын бэлиэтиибит», — диэтэ. Саха сирин олохтоохторо бэйэлэрин интэриэстэрин көмүскээн  санааларын этиэхтэрин бэлиэтээтэ.

СИА

0
0