Афанасий Владимиров: “Куоластыыр учаастактарга куттал суох буолуутун хааччыйыахтаахпыт”
Бэс ыйын 12 күнүгэр видео-кэмпириэнсийэ сибээһинэн ыытыллыбыт сүбэ мунньахха Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын дьаһалтатын салайааччы Афанасий Владимиров Бүтүн Арассыыйатааҕы куоластааһыҥҥа Усуйаана улууһа хайдах бэлэмнэнэрин көрдө.
edersaas.ru
Мунньахха сүрүн боппуруоһунан коронавирус инфекцията тарҕанар кэмигэр Роспотребнадзор ирдиир бары санитарнай-эпидемиологическай нуормаларын тутуһууга сыһыаннаах куттал суох буолуутун хааччыйыы боппуруоһа көрүлүннэ.
“Сүрүнэ – куоластыыр учаастактарга куттал суох буолуутун хааччыйыы. Харыстанар сириэстибэлэринэн, мэдиссиинэ мааскаларынан уонна бэрчээккилэринэн, дезинфекциялыыр сириэстибэлэринэн уонна мэдиссиинискэй тэриллэринэн бары учаастактардааҕы быыбардыыр хамыыһыйалары, хамыыһыйа чилиэннэрин, кэтээн көрөөччүлэри хааччыйыахтаахпыт”, — диэн соругу Афанасий Владимиров туруорда.
Салайааччы этэринэн, ыарыыттан харыстыыр сириэстибэлэри кииннээн атыылаһыы ыытыллар уонна оройуоннарга ыытыллар.
Усуйаана оройуонун баһылыгын бастакы солбуйааччы Валерий Сидоркин этэринэн, оройуоҥҥа куоластааһыҥҥа бэлэмнэнии ыытылла турар. Ыарыыттан харыстыыр сириэстибэлэри ылан, билигин оройуон нэһилиэктэригэр ыытыы боппуруоһа быһаарыллар.
Афанасий Владимиров учаастактарга дьон тоҕуоруһуутун таһаарбат туһуттан Бүтүн Арассыыйатааҕы куоластааһын сэттэ күн устата ыытылларын санатта.
Маныаха “Мобильнай быыбардааччы” тиһик көмөлөһүөҕэ. Владимиров бэс ыйын 5 күнүттэн Саха сирин олохтоохторун дьиҥнээх олорор сирдэринэн куоластыылларыгар сайабылыанньаны ылыы бара турарын санатта. Оччоҕо от ыйын 1 күнүгэр Бүтүн Арассыыйатааҕы куоластааһын күнүгэр бырапыыскалаах сиринэн куоластыыр кыаҕа суох буоллаҕына, кини дьиҥнээх олорор сиринэн куоластыыр кыахтанар.
“Бүгүн гражданнар сайабылыанньаларын “Госуслуги” уонна “Мои документы” МФЦ нөҥүө биэриэхтэрин сөп. Оттон бэс ыйын 16 күнүттэн учаастактааҕы быыбардыыр хамыыһыйалар үлэлэрин саҕалыыллар, кинилэр сайабылыанньалары ылыахтара”, — диэн эбэн эттэ Афанасий Владимиров.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни СТРЮКОВА
Мария Васильева хаартыската