Афанасий Владимиров: “Саха сирин олохтоохторо Арассыыйа чэчирии сайдыытын таллылар”
Саха Өрөспүүбүлүкэтигэр Арассыыйа Федерациятын Конституциятыгар уларытыылары киллэриигэ Бүтүн Арассыыйатааҕы куоластааһын түмүгэ таҕыста.
«Коронавирус дьаҥа тарҕаныытыттан үөскээбит уустук эпидемиологическай балаһыанньа баарын үрдүнэн, Саха сирин олохтоохторо Бүтүн Арассыыйатааҕы куоластааһыҥҥа көхтөөхтүк кытыннылар.
Бэйэтин ис хоһоонунан даҕаны устуоруйаҕа буолбут ураты түгэҥҥэ уонна дойдубут сайдыытын дьоһун түһүмэҕэр Саха сирин 350 тыһыынчаттан тахса олохтооҕо кытынна, ити быыбардааччылар уопсай ахсааннарыттан 55 бырыһыаҥҥа тэҥнэһэр. Уларытыылары куоластаабыт дьон 58 бырыһыана өйөөтө, бу өрөспүүбүлүкэбит 204 тыһыынчаттан тахса киһитэ.
Саха Өрөспүүбүлүкэтин Бырабыыталыстыбата, Саха Өрөспүүбүлүкэтин Киин быыбардыыр хамыыһыйата уонна олохтоох салайыныы уорганнара Бүтүн Арассыыйатааҕы куоластааһыны тэрийиигэ бары сөптөөх усулуобуйаны тэрийдилэр.
Бүтүн Арассыыйатааҕы куоластааһыны тэрийиигэ өрөспүүбүлүкэҕэ 789 бастайааннай уонна 29 быстах кэмнээҕи быыбардыыр учаастактар тэрилиннилэр. Бары куоластыыр учаастактар быыбардыыр хамыыһыйалар чилиэннэригэр уонна быыбардааччыларга тус бэйэлэрин харыстаналларыгар анаан сириэстибэлэринэн хааччыллыбыттара. Куоластааһын сэттэ күнүн устата учаастактарга дьиэни-уоту дезинфекциялааһын, термометрия ыытыллыбыта, дьоҥҥо куттал суоһаабатын уонна докумуону харайыы тэриллибитэ. Уустук суоллаах-иистээх уонна тэйиччи сытар сирдэргэ куоластааһын тэриллэн, 8,4 тыһыынча киһи куоластаабыта.
Сирдээҕи-уоттааҕы уонна учаастактардааҕы быыбардыыр хамыыһыйалар чилиэннэрин, миэстэтигэр кэтээн көрөөччүлэр уонна 1,2 тыһыынча волонтердар түмсүүлээх, көхтөөх уонна эппиэтинэстээх үлэлэрин түмүгэр,
Конституцияҕа куоластааһыҥҥа муҥутуур бэрээдэк хааччылынна. Үрдүк көхтөөх буолууну Өлөөн улууһун олохтоохторо көрдөрдүлэр – 90 тахса бырыһыан, Анаабыр уонна Үөһээ Бүлүү улуустарыгар туһааннааҕынан 87 уонна 85 бырыһыаны, быыбардааччылар 70 тахса бырыһыаннарын Амма, Горнай уонна Таатта ситистилэр. Уларытыыларга үлахан куолаһы Үөһээ Бүлүүгэ, Аллараа Халымаҕа, Орто Халыма оройуоннарыгар биэрдилэр.
Кэм-кэрдии биир сиргэ турбат. Аныгы олох биһиги уопсастыбабыт сайдыытыгар үрдүк сыаллары ситиһиигэ үтүө өрүттээх уларыйыылары ирдиир. Саха сирин үгүс быыбардааччылара олох, кэм-кэрдии ирдиир уларытыыларын киллэрэри өйөөбүттэрэ хайҕаллаах.
Дьон-сэргэ туруктаах олоҕо, өрөспүүбүлүкэбит уонна бүттүүн Арассыыйа чэчирии сайдыылара үйэлэргэ олохтоммут үгэстэртэн, көҥүлтэн уонна сайдыыттан тутулуктаах дии саныыбын, итилэр Арассыыйа Федерациятын саҥардыллыбыт Конституциятыгар бигэргэтилиннилэр», — диэн Ил Дархан уонна бырабыыталыстыба дьаһалтатын салайааччы Афанасий Владимиров.
Бэлэмнээтэ Женни СТРЮКОВА.
Хаартыска: саайтан