Дьокуускай куорат төрүттэммитэ 385 сылыгар аналлаах бырааһынньыкка куорат араас болуоссаттарыгар үгүс киһи муһунна. Бырааһынньыгы үөрүүлээхтик аһыы сиэрэ-туома Ленин болуоссатыгар ыытылынна.
edersaas.ru
Куорат олохтоохторун уонна ыалдьыттарын куорат баһылыга Айсен Николаев, куорат Дууматын бэрэссэдээтэлэ Александр Саввинов, Хабаровскай куорат мэрин солбуйааччы Константин Жуков, Кытай Норуодунай Өрөспүүбүлүкэтин Хэйхэ куорат мэрин солбуйааччы Сунь Хэни эҕэрдэлээтилэр.
Айсен Николаев бэйэтин этиитигэр, Дьокуускай куорат билигин ирбэт тоҥноох Уһук Хоту сиргэ саамай улахан, сайдыылаах куоратынан буоларын астына бэлиэтээтэ. Константин Жуков: «Өссө Хабаровскай куорат төрүттэнэ илигинэ эһиги куораккытыттан Охотскай уонна Амур кытылларын арыйааччылар экспедицияҕа аттаммыттара. Дьокуускайга кэнники сылларга саҥа суоллар уонна уулуссалар оҥоһулуннулар, олорор дьиэлэр, социальнай эбийиэктэр тутуллаллар», – диэн куорат олохтоохторун бырааһынньыгынан эҕэрдэлээтэ.
Бочуоттаах ыалдьыт, тойон Сунь Хэни Дьокуускай уонна Хэйхэ куораттар инникитин даҕаны бииргэ үлэлэһэллэригэр баҕа санаатын тириэртэ.
Бу күн өрөспүүбүлүкэ култуурунай-маассабай бырайыактарын сүрүннүүр исписэлиискэ, алгысчыт, тойуксут Афанасий Федоровка «Дьокуускай куорат бочуоттаах гражданина» үрдүк аат иҥэрилиннэ.
Үөрүүлээх бырааһынньыгы «Сибиир калейдоскоба» (Кузбасс к.) үҥкүү тыйаатырын артыыстара, Дьокуускай куорат айар кэлэктииптэрэ, оҕо үҥкүү ансаамбыллара уо.д.а. киэргэттилэр.
Надежда ЕГОРОВА, «Саха сирэ» хаһыат, edersaas.ru