Арассыыйа уонна Украина сыһыаннарыттан, араас сааҥсыйалар киирэннэр, сыана үрдүү турара биллэр. Сорох урбаанньыттар соруйан даҕаны үрдэтэргэ күһэллибиттэрэ иһиллэр. Сыананы үрдэтиигэ Саха сирин биллэр-көстөр урбаанньыта санаатын маннык диэн эттэ.
Афанасий Алексеев, биллэр-көстөр меценат, “Японец” маҕаһыын дириэктэрэ:
— Ытык-мааны биир дойдулаахтарым! Бу чуолаан биир идэлээхтэрбэр – урбаанньыттарга, атыылааччыларга анаан санаабын этэбин. Дойдубут уустук кэмигэр, бары бииргэ буолан, сомоҕолоһуохпутун наада. Кыаллар буоллаҕына, сыананы уруккунан тута сатыахха диэн санаабын тиэрдэбин. Күнтэн күн сыана үрдээн иһэр. Бу —дуоллартан тутулуктааҕын өйдүүбүн. Ол да буоллар, ханнык баҕарар тэрилтэҕэ, кыра буоллун, улахан буоллун, хайаан да саппаас, уурунуу диэн баар буолар. Ааспыт сылга атыылаһыллыбыт саппаас чаастар, бородуукта, табаар, бытовой тиэхиньикэлэр сыаналарын үрдэтимиэххэ диэн этэбин, нэһилиэнньэбитигэр утары барыаххайыҥ диэн барыгытын ыҥырабын. Бу этиибин өйүөхтэрэ диэн эрэнэбин.
Тэрилтэм туһунан этэр буоллахха, саппаас чааһын тиэрдээччилэр сыаналарын икки төгүл үрдэттилэр. Владивостокка манан дьарыктана олорооччулары кытта билсэ олоробун. Баар балаһыанньаттан сылтаан үгүс маҕаһыыннар сабыллыбыттар. Ол эбэтэр дуоллар хайа диэки хайыһарын, балаһыанньа хайдах-туох буоларын күүтэн олороллор. Үлэлиир сорох тэрилтэлэр бүгүҥҥү куурсунан атыылыыллар. Онон сибээстээн сыаналара үрдээтэ. Ол эрээри, “Японец” маҕаһыын сыанатын уруккунан тутан олорор. Дьоҕус маҕаһыыннар, автосервистэр кууһунан атыылаһаары гыналлар. Ону үлэһиттэрбэр кууһунан атыылаабаттарыгар эттим. Ол аата бастакы уочарат нэһилиэнньэ туһаныахтаах. Онон элбэх киһи удамыр сыаналаах саппаас чааһы туһаныах этэ буоллаҕа. Саҥа табаар кэлиэр диэри урукку сыананы тутан олоруохпут.
Өссө төгүл биир идэлээхтэрбиттэн көрдөһөбүн, сыананы уруккунан тута сатыаххайыҥ диэн. Барыгытыгар доруобуйаны, кэрэни-үтүөнү баҕарабын.