«Японец» массыына саппаас чаастарын маҕаһыыннарын ситимин генеральнай дириэктэрэ Афанасий Алексеев «Суһал көмө» үс реанимобиль-массыынаны хаачыстыбалаах шипованнай эрэһиинэнэн хааччыйда.
edersaas.ru
Кини ол туһунан Инстаграмҥа бэйэтин страницатыгар суруйар:
«Кыһыммыт аа-дьуо бэйэтин быраабын ылар. Биллэрдик тымныйан эрэр, суолга олус халтараан буолла. Үлэбинэн күнү быһа уруулга олоробун, онон ардыгар «суһал көмө» массыыналара нэһилиэнньэ ыҥырыытыгар «көтөн» кэриэтэ айанныылларын көрөбүн. Бэйэм баҕабынан балыыһа салалтатын кытары кэпсэттим, массыыналара хайдах көлүөһэлээхтэрин интэриэһиргээтим. Ол кэнниттэн үс FORD реанимобильга хаачыстыбалаах шипованнай эрэһиинэни биэрдим. Быраастар «көмүс сөкүүндэ» диэн тиэрминнээхтэр. Мин сыалым-соругум – суһал көмө өссө түргэнник кэлэрин туһугар ол күндү мүнүүтэлэри кылгатыы», – диэбит.
Ааптар баҕарбытын курдук, доруобай буолуоҕуҥ, чугас дьоммутун харыстыаҕыҥ.
ЫСПЫРААПКА:
Дьокуускай куоракка «суһал көмө» хас биирдии массыыната GPS и ГЛОНАСС систиэмэнэн хааччыллыылаах. Куоракка күн аайы ортотунан 25 биригээдэ үлэлиир. «Суһал көмө» ыстаансыйатыгар бэйэтигэр «реанимация балааталаах», «С» кылаастаах 3 реанимобиль массыына баар.
Надежда ЕГОРОВА, «Саха сирэ» хаһыат, edersaas.ru