Аэропортарга ааттары иҥэрии куонкуруһун үһүс түһүмэҕэ саҕаланна
РФ уопсастыбаннай палаатата, Нуучча тылын уопсастыбата, Арассыыйа географическай уопсастыбата, Арассыыйатааҕы байыаннай-историческай уопсастыба алтынньы 11 күнүттэн сэтинньи 30 күнүгэр диэри аэропортарга улуу дьон аатын иҥэриигэ куонкурус ыыталлар. Куонкурус түөрт түһүмэҕинэн барыахтаах.
Куонкурус бастакы түһүмэҕэр эрэгийиэннэртэн дьон аатын хомуйаллар. Иккис түһүмэххэ хас биирдии киһи биир аэропорка бэйэтин талбыт киһитин аатын киллэриэн сөп. Үһүс түһүмэххэ социологическай ыйытык түмүгүнэн, үс бастыҥ киһи аата быһаарыллар. Төрдүс түһүмэххэ хас биирдии киһи куоластыан сөп. Бэҕэһээҥҥинэн куонкурус иккис түһүмэҕэ түмүктэннэ. Иккис түһүмэххэ барыта 90 тыһ. тахса киһи кытынна. Куонкуруска барыта 47 аэропорт кыттар. Ол иһигэр Дьокуускай аэропорда эмиэ. Билиҥҥи туругунан, испииһэккэ Тыгын Дархан, Петр Бекетов, Манчаары Баһылай, Гавриил Ксенофонтов, Өксөкүлээх Өлөксөй, Марк Жирков, Платон Ойуунускай, Валерий Кузьмин, Владимир Ларионов, Михаил Николаев ааттара киирбиттэр. Үһүс түһүмэх алтынньы 31 күнүттэн сэтинньи 7 күнүгэр диэри буолуоҕа. Оттон куоластааһын сэтинньи 12-30 күннэригэр ыытыллыаҕа. Сиһилии великиеимена.рф сайтыгар киирэн билсиҥ.
Ыспыраапка:
Аэропортарга киһи аатын иҥэрии урут-уруккуттан баар үгэс. Аэропортар үксүн судаарыстыбаннай диэйэтэллэр, дойду историятыгар хаалбыт дьон, авиацияҕа сыһыаннаах үлэһиттэр, наука, култуура дьоннорун ааттарын сүгэллэр. Холобур, Америкаҕа үгүс аэропорт судаарыстыбаннай диэйэтэллэр ааттарынан ааттаммыт: Нью-Йорк аэропортара Нью-Йорк куорат мэра Фиорелло Ла Гуардия, АХШ бэрэсидьиэнэ Джон Кеннеди, Вашингтон АХШ бэрэсидьиэнэ Рональд Рейган ааттарын сүгэллэр. Оттон Италияҕа култуура дьоннорун ааттарынан үгүс аэропорт ааттанан турар: Римҥэ – худуоһунньук Леонардо Да Винчи, Болоньяҕа – араадьыйаны айбыт киһи Гульельмо Маркони, Пармаҕа – композитор Джузеппе Верди ааттара үйэ тухары суруллан турар. Оттон Арассыыйаҕа Оренбурга бастакы космонавт Юрий Гагарин, Махачкалаҕа Сэбиэскэй Сойуус Геройа Амет-Хана Султан, Ульяновскайга суруйааччы Николай Карамзин ааттара иҥэриллибиттэрэ.
Аграфена КУЗЬМИНА, «Саха сирэ» хаһыат, edersaas.ru