Федеральнай антимонопольнай сулууспа Россия аэропортарыгар үлэлиир кафелар сыаналарын бэрэбиэркэлиэҕэ. Ити туһунан антимонопольнай сулууспа салайааччыта Игорь Артемьев Федерация сэбиэтин мунньаҕар эттэ. Чахчы, баларга сыана сиэрэ суох үрдүк.
Александр ТАРАСОВ, «Саха сирэ» хаһыат, https://edersaas.ru
Мунньах кыттааччылара Россия үгүс аэропортарыгар уу, чэй уонна кофе сыаналара аһара үрдүгүн туһунан эппиттэригэр, Игорь Артемьев: «Кырдьык, аэропортар сабыылаах зонанан биллэриллэн, онно үлэлиир 3-4 кафе монополист буоллулар. Биһиги урут кинилэри ыстырааптыы сылдьыбыппыт. Ол гынан баран, билигин ити өттүгэр сөптөөх үлэни ыыта иликпит. Онон сүбэҕит иһин, махтал! Биһиги ити дьыаланан дьарыктаныахпыт», – диэн эппиэттээтэ.
Мантан инньэ аэропорт кафеларын бэрэбиэркэлээһин саҕаланара буолуо. Дьокуускай куорат авиапордугар баар кафелары бэрэбиэркэ хаһан саҕаланыан сөбүн Саха сиринээҕи антимонопольнай сулууспа салайааччытын солбуйааччы Ольга Ярыгинаттан ыйыппыппытыгар: «Ити туһунан сонуннарга кэпсээбиттэрин истибиппит. Ол гынан баран, бэрэбиэркэни оҥоруҥ диэн сөптөөх дьаһал кэлэ илик. Дьаһал кэллэ даҕаны ону хайдах толорорбутун быһаарсан, үлэни саҕалыахпыт», – диэн эппиэттээтэ.
* * *
Бу, кырдьык, сөптөөх үлэ ыытыллаары гыммыт курдук. Дьокуускай куорат аэропордугар үлэлиир кафелар уу, чэй, кофе сыаналарын икки-үс төгүл үрдэтэн атыылыыллара мэлдьэх буолбатах.