Ааспыт нэдиэлэ бүтүүтүгэр, ыраас халлааҥҥа этиҥ эппитинии, хобдох сурах бастаан үһү-бадах курдук сааллыбыта. Онтон бэҕэһээ киэһэ, хойут, ол сонун официальнай иһитиннэриинэн бигэргэннэ.
РФ Силиэстийэлиир кэмитиэтин Илин Сибиирдээҕи тырааныспарга силиэстийэлиир управлениета иһитиннэрбитинэн, Дьокуускай куорат аэропордун генеральнай дириэктэрэ Николай Местниковка холуобунай дьыала тэриллибит. РФ Холуобунай кодексатын 290-с ыст. 6-с чааһынан, ол эбэтэр, дуоһунастаах киһи сокуоннайа суох дьайыылары оҥоруу иһин, ураты бөдөҥ кээмэйдээх бэриги ылыы бэлиэтэ баарынан.
Силиэстийэ сабаҕалыырынан, хас да сыллааҕыта уорбаланааччы олохтоох урбаанньыттартан 14 мөл. солк. сууммалаах бэриги түүрэйдээн ылбыт. Ол дьон киин куорат аэропордугар бэйэлэрин дьыалаларынан туох да мэһэйэ-харгыһа суох дьарыктаналларыгар диэн.
Суут быһаарыытынан, силиэстийэ кэмигэр Местников Иркутскай куоракка силиэстийэлиир изоляторга хаайылынна.
Тугунан да бигэргэнэ илик хобдох сурах тарҕанаатын, от ыйын 6 күнүгэр тутуллубут Николай Местников интэриниэт-саайтарга иһитиннэрии таһаарбыта:
«Дорогие друзья, коллеги, единомышленники! В эти дни ваша поддержка, ваши слова очень много значат для меня и для моей семьи. Я всем вам очень признателен. Судебный процесс будет долгим, наберитесь терпения. В сложившихся обстоятельствах продолжать предвыборную кампанию невозможно. Но, я надеюсь, что все то позитивное и доброе, что мы с вами начали, будет продолжено».
Санатар буоллахха, Николай Местников Дьокуускай куорат Гагаринскай уокуругуттан Ил Түмэҥҥэ дьокутаатынан туруммута. Итинэн сибээстээн, бу дьыаланы кинини туоратар сыаллаах «политическай сакаас» быһыытынан эмиэ ылыннылар.
Итиэннэ кинини өйүүр сыаллаах илии баттааһынын хомуйан эрэллэр, аадырыстарын ыйан туран:
1. «Лайнер» эрэстэрээн, ЦСП кабинета, 18:00-20:00 ч.;
2. Курнатовскай уул., 1/4 дьиэ тэлгэһэтигэр, 18:00-20:00 ч.;
3. Кузьмин уул., 26/3 дьиэ тэлгэһэтигэр, 18:00-20:00 ч.
Биһиги корр., «Саха сирэ» хаһыат, edersaas.ru
Хаартыска: интэриниэттэн