Саха сиригэр коронавирус “омикрон” штамма олус түргэнник тарҕанан эрэринэн, Дьокуускай куорат аэропордугар миэдиктэр биригээдэлэрэ үлэлиир. Тохсунньу 20 күнүгэр сарсыарда номнуо саҥа көтөн кэлбит 15 киһи “ковидынан” ыалдьыбытын буллулар диэн өрөспүүбүлүкэтээҕи суһал ыстаап иһитиннэрэр.
Бу иннинэ аэропорка көтөн кэлбит дьонтон ПЦР-анаалыһы босхо тутар буолбуттара. Анаалыс түмүгэ суһаллык, аҕыйах мүнүүтэ иһинэн биллэр. Бу миэрэ ыалдьыбыт дьону түргэнник буларга, харантыыҥҥа ыытарга, ыарыы тарҕанарын бохсорго туһуланар.
Бу сарсыарда Дьокуускайга 4 рейс кэлбититтэн, 203 киһи анаалыс туттарбыт. Кинилэртэн 15 киһиэхэ анаалыстара “ковид” баарын көрдөрбүт.
Санатар буоллахха, суукка иһигэр өрөспүүбүлүкэҕэ 761 киһи коронавируһунан ыалдьыбыта биллэн, хаһан да буола илик «антирекорд» олохтонно.
Ангелина Васильева, “Саха сирэ” хаһыат, edersaas.ru