Адыаччы устудьуоннарын этэрээтэ тэриллиэҕэ

Ааптар: 
Бөлөххө киир:

Дьааҥы улууһун Адыаччы нэһилиэгэ халаан содулуттан чөлүгэр түһэриниигэ хайдах үлэлээн эрэрин туһунан нэһилиэк баһылыга Иннокентий Юмшановы кытта кэпсэттибит. Биллэн турар, улахан хоромньуну көрсүбүт нэһилиэк олохтоохторугар олус түбүктээх күннэр тураллар. Билигин уулуссаларыттан ууну ыытыынан дьарыктаналлар.

Күөлүнэн ырааҕынан эргийэн түһэр буолан, олус бытаан эбит. Ол кэнниттэн олорор дьиэлэри, тэрилтэлэри куурдуохтара эҥин. Айылҕа иэдээнигэр түбэспит тыа дьонун түбүгүн ааҕан сиппэккин. Хата, хочуолунайдарын, ыстаансыйаларын уу ылбакка абыраммыттар. Ол да буоллар, саппаас таас чохторо илийбит. Куурдунуу үлэтин ыытыыга ардах кэлэн түһэ турара мэһэйдиир.

Нэһилиэк баһылыга Иннокентий Юмшанов маннык иһитиннэрэр:

— Онон ибис-инчэҕэйгэ олоробут. Сүөһүбүт-сылгыбыт кыстыыр отун булунар туһугар толкуйдуубут. Кэтэх ыаллар, хаһаайыстыбалар оттуур ходуһаларын көрө, ханан ууну түһэриэххэ сөбүн быһаара бардылар. Баҕар, биир эмэ үрдүк сиргэ уу ылбатах буоллаҕына, оттоон көрөөрү. Чөлүгэр түһэриигэ төһө тутуу матырыйаала наада буоларын суһал ыстаапка тиэрдиэхтээхпит. Биһиги бэйэбит нэһилиэкпит устудьуоннарын түмэн, этэрээт тэрийээри былаанныыбыт. Биллэн турар, өрөспүүбүлүкэбит, Ил Дархаммыт, Бырабыыталыстыбабыт көмөтө улахан, онон махтанабыт. Бастакы хардыылар оҥоһулуннулар. Бүгүн Уһук Илин ФУо боломуочуйалаах бэрэстэбиитэлэ Юрий Петрович Трутнев Баатаҕайга кэлэн, 5 чаастан видеосибээһинэн кэпсэтии ыытыахтаах. Өрөспүүбүлүкэттэн бородууктаны аҕалбыттара. Ити үлэнэн “Якутоптторг” тэрилтэ дьарыктанна. Ыыппыт бородуукталарын ыалларынан түҥэппиппит. Олохтоохтор махтаналлар. Биһиэхэ ууга барбыт атын нэһилиэктэргэ курдук бырабыыталыстыба хоромньуну ааҕыыга хамыыһыйата үлэлээн барбыта, нэһилиэкпит иһигэр эмиэ хамыыһыйалаахпыт.  Үлэ олус элбэх, докумуон бөҕө ирдэнэр. Түгэнинэн туһанан улууспут баһылыгар Гаврил Ильич Чириковка, бастакы солбуйааччытыгар Гаврил Гаврилович Ефимовка, социальнай боппуруостарынан дьарыктанар Дмитрий Михайлович Габышевка эмиэ махталбытын тиэрдэбит. Бу айылҕа таһаарбыт содулун туоратыыга көмө оҥоһуллуоҕа, кыстыкка этэҥҥэ киириэхпит диэн эрэнэбит.

Женни Стрюкова

Хаартыска: интэриниэттэн

+1
0
+1
0
+1
0
+1
0
+1
0
+1
0
+1
0