«Адам кирилиэһэ» — Чурапчы олохтооҕун толкуйа...
Дьулуур - Олох-дьаһах

«Адам кирилиэһэ» — Чурапчы олохтооҕун толкуйа

Чурапчы олохтооҕо успуордунан дьарыктанарга анаан, дьиэтигэр анал тэрили (тренажер) оҥорбут.

Адам Таныков бу оҥоһугун «Адам кирилиэһэ» диэбиттэр. Бу туһунан sakha.gov.ru иһитиннэрэр. «Бу элбэх хайысхалаах кирилиэс киһи эргиччи сайдарыгар, этин-сиинин эрчийэригэр, сэниэлэнэригэр, күүстэнэригэр-уохтанарыгар, сыыдамсыйарыгар, өй-санаа да өттүнэн тулуурдаах, толкуйдаах, түргэн-тарҕан буоларыгар көмөлөөх.  Манна оҕолор эрэ буолбакка, улахан да дьон дьарыктаныахтарын сөп. Истиэнэҕэ иилэн, иҥиннэрэн туруорары таһынан, атаҕар туруоран баран, хос ортотугар да, муннукка да, ханна баҕарар туруоран кэбиһэҕин. Манна дьарыктаннахха киһи этэ-сиинэ кытаатар, былчыҥ сайдар, толкуйдуур дьоҕуруҥ эмиэ сытыыланар. Өссө волейбол корзинатын иилэн баран, ыраахтан мээчиги быраҕа үөрэнэҕин. Уопсайынан, эргиччи туһалаах», — диэбит.

Бу анал тэрил, көрдөххө, кирилиэс курдук. Дьиэҕэ, успуорт саалатыгар, хамсаныынан доруобуйаны чэбдигирдэр кэбиниэттэргэ да туруорарга табыгастаах. Муннукка кыра миэстэни ылар.

Доруобуйаны тупсарарга, чэбдигирдэргэ анал тэрили көҥүл тустууга ССРС спордун маастара, спорт бэтэрээнэ, Чурапчы улууһун Сылаҥ нэһилиэгин олохтооҕо Адам Таныков оҥорбут. Кини Павлодарга (Казахстан) пединституту бүтэрэн баран, физкултуура учууталынан үлэлээбит. Маннык тренажеру кини аан бастаан мастан 1981 сыллаахха Хадаарга олорон чочуйан туруорбут. Онтон Одьулууҥҥа, тимиртэн, 1983-1984 сыллардаахха. Билигин, бочуоттаах сынньалаҥҥа олорон, оҕолорбор, сиэннэрбэр туһалаах буоллун диэн оҥорбутун этэр.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

два + 3 =