Абытай Арамааны биир дойдулаахтара — мэҥэлэр кэриэстииллэр

Ааптар: 
Бөлөххө киир:

Бу күннэргэ Мэҥэ улууһун биллиилээх, киэн туттар киһитэ, өрөспүүбүлүкэ социальнай-экэнэмиичэскэй сайдыытыгар сүҥкэн кылааттаах уопсастыбаннай-бэлитиичэскэй  диэйэтэл Роман Иванович Брызгалов-Абытай Арамаан төрөөбүтэ 110 сылыгар аналлаах араас суолталаах тэрээһиннэр буола тураллар.

Роман Иванович Брызгалов-Абытай Арамаан аатын сүгэр Аллараа Бэстээх транспортнай техникумугар үөрүүлээх тэрээһиҥҥэ чугас аймахтара кыттыыны ыллылар.

Кинилэр бэйэлэрэ анаабыт истипиэндьийэлэрин үчүгэй үөрэхтээх, уопсастыбаннай үлэҕэ көхтөөх ыччаттарга  туттардылар.

Тэрээһин кэнниттэн эстафетаны Табаҕа нэһилиэгин олохтоохторо ыллылар.  Оскуолаҕа, музыкальнай оскуолаҕа буолбут иһирэх көрсүһүү кэнниттэн Роман Иванович Брызгалов-Абытай Арамаан аата аны аатырар Абалаахха ааттанна. Манна Р.И. Брызгалов аймахтара былырыын туруорбут Мэҥэ таас өйдөбүнньүктэригэр   уопсастыбаннай-бэлитиичэскэй диэйэтэли иһирэх тылынан аҕыннылар.

— Арамаан Брызгалов норуокка биллэр «Абытай» диэн аата кини үлэһитин, хорсун сэрииһитин уонна улахан булчутун кытары сибэстээх. Арамаан аллар атаһа, норуодунай бэйиэт Күннүк Уурастыырап 1936 сыллаахха суруйбут «Лоокууттуун кэпсэтии» диэн хоһоонугар  доҕорун туһунан маннык хоһуйбута:
Абытай Арамаан атаһым
Абалаах күөлүгэр сааланыа.
Арҕааҥы тураҥнаах атахтан
Алталыы халбаны хаптатыа.

Ити тыыннаах тыллар суруллубут миэстэтигэр аймахтара туруорбут Мэҥэ таастарыгар аатырар Абалааҕы абылата көрөн туран, Табаҕа музыкальнай оскуолатын театральнай салаатын  » Дьүһүйүү » ансаамбылын оҕолоро Р.И. Брызгаловка-Абытай Арамааҥҥа анаан хомоҕой хоһооннорун аахтылар.  Ис дууһаттан тахсар оҕолор биллиилээх киһилэрин хоһоонунан кэпсииллэрин «Майа» ТВ эрэдээктэрэ Зоя Герасимова күөх экраҥҥа көрдөрөрдүү уһулла,  үйэтиттэ. 

Майаттан Абытай Арамаан аймахтара: уопсастыбанньык З. И.Игнатьев, Моорук нэһилиэгин баһылыга А.З. Игнатьев, Табаҕаттан улуус бочуоттаах олохтооҕо Р.П. Брызгалов  уолунаан П.Р. Брызгаловтыын, Өлөчөйтөн И. З. Брызгалов, киэн туттар киһилэригэр тыыннаах сибэкки дьөрбөтүн уурдулар, амарах  ахтыыларын анаатылар. Өрөспүүбүлүкэ социальнай-экэнэмиичэскэй сайдыытыгар сүҥкэн кылааттаах уопсастыбаннай-бэлтитиичэскэй  диэйэтэл, СӨ норуотун хаһаайыстыбатын үтүөлээх үлэһитэ, Мэҥэ Хаҥалас, Өймөкөөн улуустарын Бочуоттаах гражданина, 16 сыл Саха АССР Үрдүкү Сэбиэтин дьокутаата  Роман Иванович Брызгалов үтүө аатын эдэр көлүөнэҕэ тириэрдэр бэртээхэй тэрээһин санааттан сүппэттик, олус иһирэхтик уонна уратытык ыытыллынна, — диэн Бүтэйдээх музейнай комплексын дириэктэрэ, РФ суруналыыстарын сойууһун чилиэнэ, кыраайы үөрэтээччи Константин Родионов санаатын үллэһиннэ.

Ити курдук, үтүө киһи аата умнуллубат, үйэ саас тухары ахтылла сылдьыаҕа.

Елена ПОТОЦКАЯ, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0