Абыраллаах дуу, алдьатыылаах дуу?

Ааптар: 
Бөлөххө киир:

Аныгы оҕолор тиэхиньикэни көрбүтүнэн төрүүллэр дииллэрэ чахчы. Билигин букатын оскуолаҕа киирэ илик оҕолор кытта планшеттарын кууһа сылдьаллар. Саҥа хаампыт оҕо дьонун төлөпүөннэрин былдьаһарын иһин анаан-минээн туспа планшет ылан биэрэллэр. Оонньуур доҕордоро – планшет, аралдьытар атастара — YouTube (Ютуб).

edersaas.ru

Соторутааҕыта биир учуонайы кытта ити тиэмэҕэ кэпсэтэрбэр: “Сиэп төлөпүөнэ (сотовай) маҥнай үөдүйэрин саҕана хайдах этэй, оҕолор уруок кэмигэр төлөпүөннэригэр оонньуу олороллор диэн уруок саҕаланыыта төлөпүөннэрин хомуйталаан ылаллар этэ дии. Билигин оннук буолбатах. Оҕолор уруок кэмигэр туһаныллыбат тэрил буоларын өйдөөтүлэр”, — диэн эппиттээх.  Эмиэ да санаан көрдөххө, оннук ээ. Ол эрээри, төлөпүөн кэпсэтэр эрэ ньыма буолбакка, бары социальнай ситимнэргэ ааны арыйар, ону ааһан туох баар үчүгэй-куһаҕан сонуну барытын ааҕар, быһатын, көмпүүтэри солбуйар тэрилгэ кубулуйда. Хааччахтаан туһа суох курдук. Оскуолаҕа киирэ илик кырачааннары хайдах эрэ аралдьытыахха, арыый улааппыт оҕолор анал саайтарга киирбэттэрин гына “төрөппүт хонтуруолун” холботуохха сөп. Оттон тиэхиньикэни төрөппүттэрдээҕэр уонунан төгүл ордук баһылаабыт оҕолору хайдах гынан харыстыыбыт. Итиэннэ сорох төрөппүттэр этэллэринии, төһөнөн бобоҕун, хаайаҕын да, соччонон күүскэ ыллараллар дииллэрэ кырдьык. Суруллубатах сокуон буоллаҕа. Дьэ, онно туох эрэ баар эбит, ол иһин боболлор диэн интэриэстэрин өссө көбүтэн кэбиһиэххэ сөп. Онон сэрэхтээх даҕаны курдук.

Мин көрдөхпүнэ, үгүс төрөппүттэр ону улаханнык баардылаабат курдуктар. Эбэтэр кинилэр оҕолоро аан ситимҥэ наадыйбаттар, кэпсэппит учуонайым эппитин курдук, сонуна аастаҕа дуу. Уонча сыллааҕыта аахпат көлүөнэ кэллэ диэбиттэрэ гынан баран, дьиҥнээхтии аахпат көлүөнэ дьэ бүгүн оскуола паартатыгар олорор оҕолор быһыылаах. Оскуолаҕа үөрэнэр саастарыгар иҥэриниэхтээх ылбатах билиилэрэ, арааһа, кэлин таайыа, олохторугар “оҥойон турар дьаама” буолуо суоҕа дуо, диэн санаа үүйэ-хаайа тутар. Сайдыылаах дойдуларга итинник кыһалҕа баара иһиллибэт. Эбэтэр кинилэр ити түһүмэҕи номнуо хас даҕаны сыл анараа өттүгэр ааспыттар, биһиги букатын хас даҕаны сыл хаалан иһэбит, эбэтэр кыайбат кыһалҕалара буолан сапсыйбыттара быданнаабыт. Абыраллаах дуу, алдьатыылаах дуу тэрил буолара аны 30-50 сылынан ырылхайдык көстүө турдаҕа.

Людмила ПОПОВА, “Саха сирэ” хаһыат, edersaas.ru

Хаартыска: интэриниэттэн.  

+1
0
+1
0
+1
0
+1
0
+1
0
+1
0
+1
0