Уус Алдан улууһун Бороҕон бөһүөлэгэр «Абылаҥ» диэн дуобаты, шахматы таптааччылар түмсүүлэрэ тэриллибитэ уон алтыс сылыгар барда. Нэһилиэк иһинээҕи бу түмсүүгэ сүрүннээн ыал аҕалара, эһээлэрэ сылдьаллар. Хас ый аайы Бороҕоҥҥо уонна кэмиттэн-кэмигэр ыаллыы сытар нэһилиэктэригэр тиийэн күрэхтэһии күүрээннээҕин тэрийэллэр. Бэҕэһээ «абылаҥнар» субуотунньук тэрийбиттэр.
—Иннокентий Петрович Бурнашов бэрэсидьиэннээх түмсүүгэ барыта сүүрбэттэн тахса киһи баарбыт. Күрэхтэһиилэри тэрийэрбит сэргэ, нэһилиэк иһинээҕи субуотунньуктарга, тэрээһиннэргэ куруук көхтөөх кыттыыны ылабыт. Быйыл РФ Экология сылынан, бэҕэһээ Бороҕонтон, быһа холуйан, биэс-алта килэмиэтир тэйиччи сытар урукку быраҕыллыбыт бөһүөлэккэ — Томторго, сирин-уотун хомуйан, субуотунньуктаан кэллибит, — диир түмсүү чилиэнэ, биэнсийэлээх Николай Петрович Гоголев. — Барыта сүүрбэттэн тахса куулу хомуйдубут. Итиннэ элбэх киһи сылдьар сирэ. Онон куруук ыраас, бэрээдэктээх буолуохтаах. Дьон-сэргэ да көрөн тардыныа, хомуйа сылдьыа диэн эрэллээхпит, — диэтэ кини.
Николай Петрович сибиэһэй салгыҥҥа бэйэлэрин икки ардыларыгар дуобакка, шахмакка күрэхтэспиттэрин кэпсээтэ. Маннык тэринэн үлэлээһин итиэннэ сынньалаҥы сөпкө дьүөрэлээһин үүнэр көлүөнэҕэ үчүгэй холобур буолуоҕун бэлиэтээтэ.
Биһиги корр., «Саха сирэ» хаһыат, edersaas.ru
