Абыйга улахан ойуур баһаара турда

Ааптар: 
Бөлөххө киир:

Хотугу улуустарга өҥүрүк куйаастар тураллар. Онуоха, аны, ол эҥэр улахан ойуур баһаардара саҕаланнылар.

edersaas.ru

«Саха сирин Арктиката» эригийиэннээҕи уопсастыбаннай тэрилтэ толорооччу дириэктэрэ Владилена Абрамова Абый улууһугар үс сиргэ ойуур баһаара турбутун туһунан арктическай улуус  актыыбынай уопсастыбанньыга  Максим Слепцов суһал иһитиннэриини ыыппытын бэлиэтээтэ. Итиэннэ кинини кытта кэпсэтэрбэр көрдөстө.

Максим Алексеевичка эрийэ сылдьыбыппар, уопсастыбанньык маннык быһаарда:

Белай Гораттан Дружина диэки баар Уолбут нэһилиэгэр биир уот туруута баар. Иккиһэ — улуус кииниттэн аэропорт нөҥүө өттүгэр. Үһүс улахан баһаар Сутуруохаҕа буола турар. 

Бэс ыйын 13 күнүгэр кураанах этиҥ эппитэ. Биллэн турар, ойуур уота онтон турдаҕа. Абыйга билигин 30 кыраадыс куйаас. Буруо мин олорор Кэбэргэнэбэр тиийэ кэллэ. Ол аата, биһиэхэ да чугаһаан эрдэҕэ.

Арктическай улуустары ситимниир уопсастыбаннай тэрилтэ салайааччыта Владилена Абрамова мин Максим Слепцовы кытта кэпсэтэр кэммэр,  Абый улууһун баһылыга Станислав Цюхцинскайы кытта сибээстэспит.

Муниципалитет баһылыга бэлиэтииринэн,  улахан баһаар Сутуруохаҕа турбут. Билигин улуус салалтата мунньахтыы олорор. РФ ЫБММ Саха сиринээҕи салаатын кытта сүбэлэһэн баран, көмө ыҥыран, улууска ыксаллаах быһыы-майгы түбэлтэтэ биллэриллиэх курдук, — диэн быһаарда Владилена Абрамова.

Ыраах баар ойуур баһаарын умулларар уустуктардааҕа өйдөнөр. Ол эрээри, дьон ойуур уота нэһилиэнньэлээх пууҥҥа киириэ диэн сэрэхэдийэр. Онон хоту улуустарга бастакынан абыйдарга ойуур баһаарыттан куттал үөскээбитинэн сибээстээн, улуус дьаһалтата  Ыксаллаах быһыы-майгы министиэристибэтин көмөтүнэн, суһал миэрэлэри, түргэн быһаарыыны ылынан, нэһилиэнньэ олоҕор ойуур баһаарын куттала суоһаабатыгар, дьон олоҕо, доруобуйата айгыраабатын туһугар кэпсэтии ыытар.

Елена ПОТОЦКАЯ, «Саха сирэ» хаһыат», edersaas.ru 

Хаартыска: Максим Слепцов тиксэриитэ.

+1
0
+1
0
+1
0
+1
0
+1
0
+1
0
+1
0