Сайын ардах уутугар, кыһын халыҥ хаарга баттаппыт Абый улууһугар быйылгы кыстыкка киин улуустартан 550 туонна от уонна сенаж тиксэриллиэхтээх.
Василий Никифоров, «Саха сирэ» хаһыат, edersaas.ru
Уустук балаһыанньалаах улууска от тиэниилээх бастакы массыыналар өссө тохсунньу ортотугар уһун айаҥҥа туруммуттара. Итиэннэ Муома Хонуутугар тиийэн суол арылларын кэтэһэн баран, суолу оҥорооччулар кэннилэриттэн тута Абый нэһилиэктэригэр Мэҥэ Хаҥалас улууһун “Хорообут” ТХПК-тэн тиэммит отторун тиксэрдилэр. Тиэйии-таһыы үлэтин, өрүү буоларын курдук, үгүс өттүн “Туймаада-Агроснаб” ААУо тиэхиньикэтэ толорор.
Саха информационнай агентствотыгар уһуннук үлэлээбит биир идэлээхпит, саха кыраҕы харахтаах фотосуруналыыһа Петр Оконешников “Дьокуускай – Халыма” федеральнай айан суолугар “Туймаада-Агроснаб” хампаанньа суоппардарын Афанасий Катаевы уонна Николай Ядреевы көрсө түһэн, хаартыскаҕа түһэрбитин биэрдэ. Отунан салҕаммыт Абый ыаллара, хаһаайыстыбалара Афанасий Васильевичка уонна Николай Петровичка махталларын ыыталлар. Мантан саас кинилэр өссө хастыы да рейси оҥоруохтара. Хоодуот суоппардарга суоллара судургу, аартыктара аһаҕас буоллун!
Василий Никифоров, «Саха сирэ» хаһыат, edersaas.ru
Петр ОКОНЕШНИКОВ хаартыскаҕа түһэриитэ.