2017 сыл муус устар 9 күнүгэр “Абый улууһа” муниципальнай оройуон баһылыгын болдьоҕун иннинэ быыбара буолар. Онно бэлэмнэнэн бүгүн, кулун тутар 3 күнүгэр, “Биир ньыгыл Арассыыйа” баартыйаттан баһылыкка хандьыдааттары талыыга барыллаан куоластааһыны тэрийэн ыытта. Цюхцинский Станислав Янович баһыйар элбэх куолаһы ылла.
Роман Попов, “Саха сирэ” хаһыат, https://edersaas.ru
Манна баартыйа чилиэннэрин сэргэ уопсастыбаннай тэрилтэлэр бэрэстэбиитэллэрэ эмиэ кытыннылар. Регистрацияны 110 быыбарсык ааспытыттан, 103 киһи кэлэн бүлүтүөн ылан куоластаата. Быыбартан уратыта диэн, праймериз кыттыылааҕа хас да хандьыдаакка куоластыыр бырааптаах.
Праймеризка кыттыбыт кандидаттар:
- Ефимов Айдар Михайлович, нэһилиэнньэ социальнай өттүнэн көмүскэллээх буолуутугар улуустааҕы управление салайааччыта, 1974 с. төрүөх
2. Тимофеев Ньургун Николаевич урбаанньыт, 1965 с. төрүөх
3. Цюхцинскэй Станислав Янович, “Абый улууһа” муниципальнай оройуон баһылыгын эбээһинэһин толорооччу, 1964 с. төрүөх
Куолаһы ааҕыы түмүгүнэн, Ефимов Айдар Михайлович уонна урбаанньыт Тимофеев Ньургун Николаевич 26-лыы куолаһы ыллылар. Оттон Цюхцинский Станислав Яновичка 70 куолас бэрилиннэ.
Онон, “Биир ньыгыл Арассыыйа” баартыйа ыыппыт “Абый улууһа” муниципальнай оройуон баһылыгын барыллаан куоластааһыныгар Цюхцинский Станислав Янович кыайыылааҕынан билинилиннэ.
Абыйга буолбут праймериз түмүгүн “Биир ньыгыл Арассыыйа” регионнааҕы салаатын полит-сэбиэтэ бу киэһэ бигэргэттэ.
Роман Попов, “Саха сирэ” хаһыат, https://edersaas.ru