Бүгүн К.О.Гаврилов аатынан Дьокуускайдааҕы атыы-эргиэн потребительскай кооперациятын кэллиэһигэр киин тутар хамыыһыйа үлэтин саҕалаата. Ол аата, улууска үлэлии олорор кэллиэстэр, тиэхиньикумнар абитуриеннартан докумуоннарын бары биир сиргэ олорон тутталлар. Ити, үөрэххэ туттарсааччыга табыгастаах.
edersaas.ru
СӨ үөрэҕин уонна наукатын миниистирин солбуйааччы Ньюргуна Соколова иһитиннэрбитинэн, 2019-2020 үөрэх дьылыгар орто анал үөрэх тэрилтэтигэр 6422 бүддьүөт (босхо) миэстэтэ көрүллүбүт. Итинтэн 3030 миэстэҕэ 9-с кылаас базатынан ылаллар.
“Быйылгы үөрэх дьылыгар докумуону тутууга икки сүрүн уларыйыы киирдэ. Бастатан туран, Дьокуускайдааҕы үп-экэниэмикэ, Дьокуускайдааҕы педагогическай, Сибээс уонна энэргиэтикэ, Покровскайдааҕы кэллиэстэргэ уонна Алданнааҕы политиэхиньиичэскэй, Тырааныспар тиэхиньикумнарыгар туттарсар абитуриеннар докумуоннарын дьиэлэриттэн тахсыбакка эрэ электроннайынан ыытыахтарын сөп. Иккиһинэн, сетевой бырагыраама диэн үлэлээн эрэр”, — диэн кэпсээтэ.
СӨ үөрэҕин уонна наукатын министиэристибэтин үөрэххэ ылыы хампаанньатын эрэгийиэннээҕи эппиэттээх үлэһитэ Анжелика Игнатьева иһитиннэрбитинэн, 2019-2020 үөрэх дьылыгар, уопсайа, 6 саҥа идэни арыйбыттар. Ол курдук, Дьокуускайдааҕы сибээс, энергетикэ кэллиэһигэр “обеспечение информационной безопасности автоматизированных систем”, Үөһээ Бүлүүтээҕи тиэхиньикумҥа “лаборант-аналитик”, Дьокуускайдааҕы коммунальнай-тутуу тиэхиньикумугар “информационные системы обеспечения градостроительной деятельности”, “сервис домашнего коммунального хозяйства”, Жатайдааҕы тиэхиньикумҥа “докер-механизатор”, Дьокуускайдааҕы ойуулуур-дьүһүннүүр кэллиэскэ “реставрация” идэлэрэ арыллыбыттар. Инньэ гынан, саҥа идэлэргэ 11-с кылаас базатыгар 100, 9-с кылаас базатыгар 30 бүддьүөт миэстэтин көрбүттэр.
Оттон ханнык үөрэх ордук куонкурустаах эбитий? Дьокуускайдааҕы педагогическай кэллиэскэ сыллата элбэх сайабылыанньа киирэр. Быйыл даҕаны урукку сыллартан уларыйыы суох эбит. “Оскуола иннинээҕи үөрэхтээһин” уонна “эбии үөрэхтээһин педагога” идэлэргэ сүрүннээн биэрбиттэр. Биир миэстэҕэ номнуо 7-10 киһи куонкурустаһар. Орто анал үөрэхтэргэ докумуону атырдьах ыйын ортотугар диэри туталлар, онон сылыктаатахха, куонкурус өссө эбиллэр чинчилээх. Үс элбэх сайабылыанньалаах үөрэх тэрилтэтин кэккэтигэр Дьокуускайдааҕы медицинскэй кэллиэс итиэннэ Дьокуускайдааҕы сибээс уонна энергетикэ кэллиэһэ киирэллэр.
Людмила ПОПОВА, “Саха сирэ” хаһыат, edersaas.ru
Ольга СТАРОСТИНА (СИА) хаартыскаҕа түһэриилэрэ.