Абитуриеннары филология бакылтыатыгар ыҥыраллар

Ааптар: 
Бөлөххө киир:

Үөрэххэ туттарсыы үгэннээн турар кэмэ. Эбии тургутуулаах үөрэхтэргэ итиэннэ орто анал үөрэх кэнниттэн туттарсааччылартан сайабылыанньаны от ыйын 10 күнүнэн тутан бүтэллэр, олор кэккэлэригэр ХИФУ филологияҕа бакылтыатыгар эмиэ.

edersaas.ru

Хотугулуу-Илиҥҥи федеральнай университет филологияҕа бакылтыатын суруналыыстыкаҕа хаапыдыратын сэбиэдиссэйэ, дассыан Олег Сидоров:

Быйыл үөрэххэ туттарсыы урукку сыллартан улахан уратыта суох. Сайабылыанньа киирэ турар. Ол гынан баран, кэлиҥҥи икки сылга ыарыы дьаҥа туран үөрэххэ тутуу усулуобуйата уларыйбыта эмиэ дьайар дии саныыбын.

2022-2023 үөрэх дьылыгар филология бакылтыатыгар бакалавриакка барыта тоҕус хайысхаҕа үөрэххэ ылабыт. Хайысхаларынан Арассыыйа, тас дойду университеттарын кытта эмиэ үлэлэһэбит. Ол курдук, нуучча тылын омук тылын быһыытынан үөрэтии хайысхатыгар Кытай, атын да араас омук сирдэриттэн кэлэн устудьуоннар нуучча тылын үөрэтэллэр. Ыччат атын дойду оҕолорун кытта алтыһары сэҥээрэр.

Филология бакылтыата киэҥ хайысхалаах. Уопсастыбаннай билим, философия, социология, экэниэмикэ, география – барыта баар. Суруналыыстыкаҕа устудьуоннар саха тылын, тылбааһы эмиэ үөрэтэллэр. Академическай үөрэх быһыытынан дириҥ, киэҥ билиини иҥэрэр, — диэн сэбиэдиссэй бэлиэтиир.

Манна даҕатан эттэххэ, бу иннинээҕи сылларга суруналыыстыка салаатыгар үөрэнээччилэр Кытай, Казахстан университеттарыгар, Москватааҕы судаарыстыбаннай университекка баран үлэҕэ холонон көрөр быраактыкалары эмиэ ааһаллар эбит.

Суруналыыстыка хайысхатыгар туттарсааччылартан, бастакытынан, айар тургутуу (творческое испытание) ирдэнэр. Оҕолор бэйэлэрэ суруйбут үлэлэрин (хаһыакка, саайтка ыстатыйа, тэлэбиидэнньэҕэ, араадьыйаҕа биэрии) туттараллар эбэтэр бэриллибит тиэмэлэринэн эссе суруйан ыытыахтаахтар. Иккиһинэн, туттарсар оҕолор сэһэргэһиини (собеседование) ааһаллар. Онон абитуриент айар дьоҕурун көрөллөр уонна суруналыыс буолар баҕатын, суруналыыстыка туһунан уопсай өйдөбүлүн, о.д.а. ыйыталаһаллар.

Өрөспүүбүлүкэ, дойду, норуоттар икки ардыларынаҕыы олимпиадаларга, куонкурустарга миэстэ, ГТО бэлиэтин, о.д.а. ситиһии иһин тус баал эбиллэр. Испииһэгин сиһилии ХИФУ саайтыгар билсиэххэ сөп.

Филология бакылтыатын хайысхалара:

— журналистика – айар тургутуу — 60 б.; нуучча тыла; литэрэтиирэ.

— реклама и связи с общественностью – нуучча тыла; обществознание; история /омук тыла.

— Реклама и связи с общественностью (реклама и связи с общественностью. Сетевая программа (совместно с САФУ)) – нуучча тыла; обществознание; история /омук тыла.

— Педагогическое образование (с двумя профилями подготовки) (Русский язык и Иностранный язык (английский)) – нуучча тыла; омук тыла/литэрэтиирэ; обществознание.

— Педагогическое образование (с двумя профилями подготовки) (Русский язык и Литература) – нуучча тыла; литэрэтиирэ; обществознание.

— Филология (Преподавание филологических дисциплин (русский язык как иностранный)) – нуучча тыла; литэрэтиирэ; омук тыла.

— Филология (Прикладная филология (русский язык как иностранный)) (программа двойного дипломирования совместно с Хэйлунцзянским Восточным университетом г. Харбин (КНР))) – нуучча тыла; идэҕэ тургутуу (кытай тылыгар тест) – 40 б.; омук тыла.

— Филология (Прикладная филология (филологический консалтинг)) – нуучча тыла; литэрэтиирэ; омук тыла /обществознание.

—  Филология (Русский язык и литература) – нуучча тыла; литэрэтиирэ; омук тыла /обществознание.

Филология бакылтыатыгар тус сыаллаах үөрэх (целевой), бүддьүөт, төлөбүрдээх миэстэ барыта көрүллэр. Тыл үөрэхтээҕэ, суруналыыс буолуон баҕалаах оҕолору, хаалбыт күннэри баттаһа бу сыл от ыйын 10 күнүн киллэрэн туран филология бакылтыатыгар күүтэллэр.

Людмила ПОПОВА, “Саха сирэ” хаһыат, edersaas.ru

Хаартыска: ХИФУ саайтыттан.

+1
0
+1
0
+1
0
+1
0
+1
0
+1
0
+1
0