Хотугулуу-Илиҥҥи федеральнай университет орто анал үөрэҕэр 1251 абитуриент 2876 сайабалыанньаны биэрбит. Саҥа үөрэх дьылыгар бүддьүөт миэстэтигэр 240 абитуриены ылар былааннаах.
Инфраструктурнай технология кэллиэһигэр 2274, үп-экэниэмикэ институтугар 109, юридическай бакылтыакка 358, мэдиссиинэ институтугар 119 сайабалыанньа киирбит.
Аллараа Бэстээх 1-кы нүөмэрдээх оскуолатын бүтэрбит Светлана Винокурова Кытайга үөрэнэ барарга былааннаммыт эбит. Ол эрээри, аан дойдуга бүрүүкээбит балаһыанньанан сибээстээн, кыаллыбатах. Биир кэлим эксээмэни (ЕГЭ) туттарбатах буолан, Светлана докумуонун юридическай бакылтыат кэллиэһигэр биэрбит. “Мин өрүү гуманитарнай биридимиэттэргэ талаһарым, ол иһин юридическай хайысханы таллым. Үөрэх кыһатыгар сайдыахпын, араас сиэксийэлэргэ сылдьыахпын баҕарабын”, — диэн санаатын үллэстэр.
Геннадий Михайлов экэнэмиис-финансист буолуон баҕарар. Атын саайтарга тэҥнээтэххэ, ХИФУ абитуриенын “тус кэбиниэтэ” (личный кабинет абитуриента) докумуону онлайнынан ыытарга табыгастаах диир. Кини орто үөрэҕинэн муҥурдаммакка, үрдүк үөрэххэ үөрэнэр былааннаах. Геннадий айар үлэни сэҥээрэр, ону тэҥэ спордунан дьарыктанар. П.П. Ощепков аатынан Токко интэринээт-оскуолатын бүтэрбит эдэр киһи университет араас тэрээһиннэригэр, сиэксийэлэригэр уонна куруһуоктарыгар сылдьан бэйэтин кыаҕын арыйарга эрэллээх.
Ирина Тимофеева үп-экэниэмикэ институтугар орто үөрэҕи баһылыыр былааннаах. Үрдүк үөрэҕи бүтэрбит дьон ХИФУну бастыҥ үөрэх кыһатынан ааҕалларын, тоҕо диэтэххэ, манна үөрэтии араас көрүҥэ, уо.д.а. туһанылларын этэр. “Үп дьыалатын уруккуттан сэҥээрэбин. Бу идэ суолтата хаһан даҕаны сүтүө суоҕа дии саныыбын. Орто үөрэххэ баалбынан хапсар буолан таллым уонна орто үөрэхтэн саҕалыахпын баҕарабын”, — диэн кэпсиир.
Кристина СТЕПАНОВА, ХИФУ пресс-сулууспата.
Хаартыска: Светлана ВИНОКУРОВА тус архыыбыттан.