Үөрэххэ туттарсыы ортолоото. Абитуриеннар күннэтэ үөрэх кыһаларын саайтарыгар хас оҕо сайабылыанньа биэрбитин, төһө бааллаахтарын ааҕар, үөрэххэ киирэр кыахтааҕын дуу, суоҕун дуу кэтиир долгутуулаах күннэрэ үүннүлэр. Атыттар биир кэлим эксээмэннэрин түмүгэ биллэн, эбии атын үөрэххэ туттарсары толкуйдууллар. Докумуону хаһыска диэри туттарыахтарын сөбүй?
Докумуону тутуу сүрүн болдьоҕо үгүс үөрэх кыһаларыгар сүрүннээн биир эрээри, аҕыйах күнүнэн уратылаһаллар. Абитуриеннарга, чуолаан бакалавриакка уонна специалитекка туттарсааччыларга чопчулаан биэрэр наадатын иһин, үөрэх кыһаларыттан туоһуластыбыт.
Хотугулуу-Илиҥҥи федеральнай университет (ХИФУ)
Бүддьүөт (босхо) миэстэлэригэр:
ХИФУ бэйэтин эксээмэннэрин, эбии тургутууларын туттарар (по вступительным испытаниям) ирдэлэргэ докумуону от ыйын 31 күнүгэр диэри туппуттара. Биир кэлим эксээмэн (ЕГЭ) түмүгүнэн эрэ туттарсааччылартан атырдьах ыйын 18 күнүгэр диэри ылаллар.
Төлөбүрдээх миэстэлэргэ:
ХИФУ бэйэтин эксээмэннэрин, эбии тургутууларын туттарар (по вступительным испытаниям) ирдэлэргэ докумуону атырдьах ыйын 7 күнүнэн ылан бүппүттэрэ. Биир кэлим эксээмэнинэн (ЕГЭ) туттарсааччылартан атырдьах ыйын 20 күнүгэр диэри ылаллар.
Кэтэхтэн үөрэххэ (төлөбүрдээх):
ХИФУ бэйэтэ ыытар эксээмэннэрин туттарар, тургутуулаах идэлэргэ алтынньы 9 күнүгэр диэри, биир кэлим эксээмэн (ЕГЭ) эрэ түмүгүнэн туттарсааччылартан алтынньы 16 күнүгэр диэри докумуоннары туталлар.
Онтон ХИФУ орто анал идэлэригэр (СПО) киириэхтэрин баҕалаахтартан — атырдьах ыйын 25 күнүгэр диэри.
ХИФУ сайта: https://postupi.s-vfu.ru/
Арктикатааҕы судаарыстыбаннай агротехнологическай университет (АГАТУ)
Бүддьүөт (босхо) миэстэлэригэр:
Ханнык баҕарар атын үрдүк үөрэх кыһаларын курдук АГАТУ бэйэтин эксээмэнин, тургутууларын (вступительные испытания) туттаран киирээччилэртэн докумуоннары атырдьах ыйын 8 күнүгэр диэри ылбыта. Биир кэлим эксээмэн (ЕГЭ) түмүгүнэн эрэ киирээччилэртэн атырдьах ыйын 18 күнүгэр диэри туталлар.
Төлөбүрдээх миэстэлэргэ:
Төлөбүрдээх миэстэлэргэ (күнүскү үөрэххэ) туттарсар дьонтон балаҕан ыйын 30 күнүгэр, кэтэхтэн туттарсааччылартан алтынньы 30 күнүгэр диэри ылаллар.
Онтон АГАТУ орто анал идэлэригэр (СПО) бүддьүөт миэстэлэригэр атырдьах ыйын 25 күнүгэр диэри ыытыаххытын сөп.
АГАТУ сайта: http://www.agatu.ru/postupi/
Култуура уонна искусство Арктикатааҕы института (АГИКИ)
Бүддьүөт (босхо) миэстэлэригэр:
АГИКИ бэйэтэ ыытар эксээмэннэрин, эбии тургутууларын (вступительные испытания) туттаран киирээччилэртэн атырдьах ыйын 3 күнүгэр ылан бүппүттэрэ. Биир кэлим эксээмэн (ЕГЭ) түмүгүнэн эрэ киирээччилэртэн атырдьах ыйын 18 күнүгэр диэри сайабылыанньалары туталлар.
Төлөбүрдээх миэстэлэргэ:
Төлөбүрдээх миэстэлэргэ үөрэх кыһата бэйэтэ ыытар эксээмэннэрин, эбии тургутууларын (вступительные испытания) ааһан киирээччилэртэн атырдьах ыйын 24 күнүгэр диэри, биир кэлим эксээмэн (ЕГЭ) түмүгүнэн эрэ туттарсааччылартан атырдьах ыйын 28 күнүгэр диэри, кэтэхтэн үөрэххэ киириэн баҕалаахтартан балаҕан ыйын 14 күнүгэр диэри ылаллар.
АГИКИ сайта: http://priem2020.agiki.ru/
СӨ орто анал үөрэҕин кыһаларыгар (СПО)
Саха Өрөспүүбүлүкэтин орто анал үөрэҕин кыһаларыгар (кэллиэс, училище) эбии тургутуулаах идэлэргэ (вступительные испытания) быһа холоон атырдьах ыйын 15 күнүгэр, онтон атыттарга атырдьах ыйын 25 күнүгэр диэри докумуоннаргытын ыытыаххытын сөп.
Үөрэххэ туттарсыы чопчу болдьоҕун үөрэх кыһаларын сайтарыттан билсиэххитин сөп. Сиһилии иһитиннэриини СӨ Үөрэҕин уонна министиэристибэтин сайтыгар https://minobrnauki.sakha.gov.ru/abiturientu1/abiturientu-spo ыйыллыбыт сигэнэн көрүөххүн сөп.
Людмила ПОПОВА, “Саха сирэ” хаһыат, edersaas.ru