Нэдиэлэ кэриҥэ Дьокуускай, Нерюнгри куораттарга ыытыллыбыт “Абилимпикс” чөмпүйэнээт сүүмэрдиир күрэхтэһиитэ түмүктэннэ. Тэрийээччилэр иһитиннэрбиттэринэн, быйыл барыта 130-тан тахса киһи кыттыбыт. Оскуола үөрэнээччилэрэ, устудьуоннар уонна улахан дьон диэн арахсан, уопсайа, 18 компетенцияҕа күрэхтэстилэр.
edersaas.ru
СӨ үөрэҕин уонна наукатын миниистирин бастакы солбуйааччы Михаил Присяжнай кыттааччы ахсаана сыллата эбиллэн иһэрин бэлиэтиир: “Бүтэһиктээх түмүк, биллэн турар, доруобуйаларынан хааччахтаах дьону үлэҕэ киллэрии буолар. Бастакы сылларга үлэ биэрээччилэри ыҥырар этибит. Туох чөмпүйэнээтин чопчу билбэттэр этэ. Былырыыҥҥыттан ыла үлэ биэрээччилэр бэйэлэрэ эмиэ эспиэрдииллэр”, — диэн быһаарда. Оччотугар доруобуйаларыгар хааччахтаах дьон көннөрү кыттыбакка, үлэ булаллара судургутуйар.
Биир кэрэхсэбиллээҕэ баар, чөмпүйэнээт көннөрү иис, массаас компетенцияларын эрэ муҥурдаммат. Аныгы кэмҥэ ирдэнэр көмпүүтэргэ сыһыаннаах хайысхаларга эмиэ кытталлар, олоҕу кытта тэҥҥэ хардыылыыллар. Дьокуускайдааҕы сибээс уонна энергетикэ кэллиэһин бастакы кууруһун устудьуона Сергей Филиппов көмөтүнэн “Сетевое и системное администрирование” компетенция кыайыылааҕа, үһүс куурус устудьуона Айсен Ефремовтан аҕыйах ыйытыыга хоруйдууругар көрдөстүм:
— Биһиги компетенциябытыгар барыта биэс киһи кытынна. Куонкуруска балаҕан ыйыттан бэлэмнэнэн саҕалаабытым. Хас күн аайы дьарыктаммытым. Былырыын иккис миэстэлэммитим, быйыл тупсардым, бастаатым. Олус үөрэбин. Дьонум-сэргэм киэн тутталлар. Быйыл сорудаҕа балай даҕаны уустук этэ. Олус кылгас бириэмэни биэрэллэр, баара-суоҕа 4 чаас. Сотору Москваҕа Саха сирин аатын көмүскүү барар буоллум, — диэн санаатын үллэстэр. Миэхэ тылбаасчыттаабыт Сергей тустаах компетенцияҕа иккис миэстэни ылбыт, уолаттар биир оскуолаҕа үөрэммит буолан бэйэ-бэйэлэрин билсэллэр эбит. Ону ааһан Айсен Сергейгэ бэлэмнэнэригэр көмөлөһөр.
Санатан эттэххэ, чөмпүйэнээт 18 компетенциянан барда. Кыайыылаахтар Саха сирин сүүмэрдэммит хамаандатыгар киирэн сэтинньигэ Арассыыйатааҕы “Абилимпикс” чөмпүйэнээт финалыгар кытта барар чиэскэ тигистилэр. 2016 сылтан өрөспүүбүлүкэ аатын көмүскээччилэр өрүү мэтээллээх кэлэллэр. Бу да сырыыга оннук буоллар ханнык диэн эрэл санаалаахтар.
Людмила ПОПОВА, “Саха сирэ” хаһыат, edersaas.ru