“Абилимпикс” чөмпүйэнээккэ сыллата кыттааччытын ахсаана эбиллэн иһэр
Алтынньы 7-13 күннэригэр Дьокуускайга уонна Нерюнгрига “Абилимпикс” чөмпүйэнээт ыытыллаары турар. Тэрийээччилэр, быһа холоон, 100-чэкэ киһи кыттыа диэн сабаҕалыыллар.
“Саха сирэ” хаһыат, edersaas.ru
Быйыл 18 компетенциянан 21 күрэхтэһии буолуо диэн иһитиннэрэллэр. Барыта 14 былаһаакканан барара биллэр. Быйыл “мультимедийнэй суруналыыстыка”, “оҕуруонан тиһии”, “медицинскэй уонна социальнай көрүү”, “лаборатория медицинскэй анаалыһа”, “сетевой уонна системнай администрирование”, о.д.а. курдук олоххо туһалаах, дьон сэҥээриитин ылар компетенциялар киириэхтэрэ. Дьыалабыай бырагыраама иитинэн Дьокуускайга уонна Нерюнгригэ биэс мунньах, “төгүрүк остуол” былааннанар.
Манна даҕатан эттэххэ, чөмпүйэнээккэ сыллата кыттааччытын ахсаана үксээн иһэр. Ол курдук, Саха сиригэр маҥнай ыытылларыгар, 2016 сыллаахха, 23 киһи кыттыбыт эбит буоллаҕына, былырыыҥҥы тэрээһиҥҥэ 87 куонкурустаһааччы хабыллыбыта. Онтон быйыл 100-чэкэ киһи кэлиэ диэн сабаҕалыыллар.
Тэрээһин аһыллыыта алтынньы 8 күнүгэр күрэхтэһии буолар сирдэригэр миэстэтигэр барыаҕа. Онтон түмүктүүр тэрээһин алтынньы 11 күнүгэр Дьокуускай куораттааҕы Оҕо айымньытын дыбарыаһыгар буолуоҕа.
Людмила ПОПОВА, “Саха сирэ” хаһыат, edersaas.ru
Хаартыска — интэриниэттэн.