“Абилимпикс” чөмпүйэнээт сүүмэрдиир күрэхтэһиитэ Саха сиригэр 2016 сылтан бэттэх ыытыллар. Быйыл 19 компетенциянан, уопсайа, 141 киһи кытынна.
Тэрээһин сүрүн соругунан доруобуйаларынан хааччахтаах дьону үлэнэн хааччыйыы буолар. Тэрийээччилэр бэлиэтииллэринэн, ааспыт сылларга тэҥнээтэххэ, быйыл оскуола оҕолоро хото кыттыбыттар, ол курдук 45 үөрэнээччи күрэхтэспит.
Миниистир Владимир Егоров, былырыын Москваҕа, финалга 21 киһи кыттыбытыттан, түөрдэ миэстэлэспитин санатта. Ону тэҥэ, Нерюнгри куораттан исписэлиистэр ортолоругар күрэхтэспит кыттааччы Германияҕа стажировкаҕа ыҥырыллыбытын этэр, аан дойдутааҕы чөмпүйэнээккэ кандидат эбит. “Быйыл оскуола оҕото хото кытынна. Итиэннэ исписэлиистэр балачча элбэхтэр. “Абилимпикс” доруобуйаларынан хааччахтаах дьон салгыы олоххо миэстэлэрин, үлэ булалларыгар улахан суолталаах”, — диэн миниистир бэлиэтиир.
Медицинскэй кэллиэс 1 кууруһун устудьуона Туйаара-Умсулган Иванова: “Абилимпикска” иккиһин кыттабын. Былырыын иккис миэстэ буолбутум, быйыл — бастаатым. Куонкурус тыҥааһыннаах. Киһи долгуйар, эппиэтинэстээх. ”Медицинскэй уонна социальнай уход” компетенцияҕа бэһиэ буолан кытынныбыт: Алдантан, Жатайтан уонна куораттан. Сорудаҕа ыарахан. Мин саҥа үөрэтэ сылдьар тиэмэм буолан уустук. Ыарыһахха көмө оҥордубут, утуйар таҥаһын уларыттыбыт, кресло-каталкаттан ороҥҥо көһөрдүбүт, медицинскэй сиэстэрэ илиитигэр хаан түспүт буоллаҕына тугу гынары көрдөрдүбүт уонна бронхиальнай астмалаах ыарыһах бопторор түгэнигэр бастакы көмөнү хайдах сөпкө оҥорору көрдөрдүбүт, ыйааһына улахан киһиэхэ уойууттан сэрэтии туһунан кэпсээтибит. Былырыыҥҥыны кытта тэҥнээн көрдөххө, сорудаҕа биир эрээри, кыра уларыйыылардаах. Холобур, былырыын ыарыһах ырбаахытын уларыппыт буоллахпытына, быйыл утуйар таҥаһын уларытыыны киллэрэн биэрбиттэр. Ити курдук, кыра уларыйыылар бааллар. Үөрэхпин бүтэрдэхпинэ идэбинэн үлэлиир санаалаахпын. Дьокуускайга дуогабардаахпын”, — диэн санаатын үллэстэр.
“Портной” компетенцияҕа кыттан бастакы миэстэни ылбыт Сусанна Павлова Дьокуускайдааҕы технология уонна дизайн кэллиэһигэр 1 кууруска үөрэнэр. 2018 сыллаахха “хаартыска” компетенцияҕа кыттан 2-с миэстэлэммит. Быйыл бэйэтэ үөрэнэр идэтинэн кыттыбыт. “Түөрт чаас биллибэккэ ааһан хаалла. Рубашка тигэргэ сорудахтаабыттара. Хата, бүтэрдим”, — диир.
Күрэхтэһии ыытыллар миэстэтигэр – Дьокуускайдааҕы технология уонна дизайн кэллиэһигэр биэс кыттааччы массыынаҕа умса түһэн, лен матырыйаалтан дьахтар рубашкатын тигэ олороллоро. Туох баар ирдэбили тутуһан, түөрт чаас иһигэр бүтэриэхтээхтэр эбит. Кылаабынай эксперт Наталья Андреева иһитиннэрбитинэн, биэс кыттааччы бары устудьуоннар эбит. Сыллата кыттааччылар таһымнара үрдээн иһэрин ыйар. Ааспыт үс күрэхтэһиигэ үһүөннэригэр Дьокуускайдааҕы технология уонна дизайн кэллиэһин устудьуоннара бастаабыттар эбит. “Москваҕа финалга Арассыыйа бары муннугуттан түөрт уонтан тахсалыы киһи тиийэн кыттар. Биһиэннэрэ сүүрбэ бастыҥ иистэнньэҥ иһигэр киирээччилэр. Онтон былырыын барбыт кыыспыт үрдүк таһымнаахтык кытынна. Түөрт уонтан тахса киһиттэн финалга тахсан, тоҕус бастыҥ кэккэтигэр киирбитэ. Онон “портной” компетенцияҕа былырыыҥҥы көрдөрүүбүт үчүгэй диэн сыаналыыбыт”, — диэн этэр.
“Абилимпикс” өрөспүүбүлүкэтээҕи түһүмэҕин кыайыылаахтара салгыы Москваҕа баран Саха сирин аатын көмүскүөхтэрэ. Ситиһиилэри баҕарабыт!
Людмила ПОПОВА, edersaas.ru