«Куттала суох уонна хаачыстыбалаах массыына суола» диэн национальнай бырагыраама чэрчитинэн «Абалаах” массыына суолун 9,29 килэмиэтирэ оҥоһуллан бүттэ. Оттон бэҕэһээ Мэҥэ Хаҥалас улууһун Өлөчөй сэлиэнньэтигэр үөрүүлээх арыллыыта буолла. Cуолу «Саха суоллара” САУо оҥордо.
«Абалаах” суолун оҥоруу сүүрбэ сыллааҕыта саҕаламмыта. Бу суолунан Майаттан Мэҥэ Ханалаһынан, Чурапчынан “Халыма” федеральнай уонна “Амма” эрэгийиэннээҕи суолларга быһа тахсыллар. Уопсай уһуна 133,84 км.
СӨ бырабыыталыстыбатын бэрэссэдээтэлин бастакы солбуйааччы Алексей Колодезников үөрүүлээх тэрээһиҥҥэ мустубут дьоҥҥо туһаайан маннык эттэ: “Национальнай бырайыакка киирэн суол оҥоһуллуутун түргэтэттибит. Билигин уопсайа 70 км бүттэ, өссө 63 км хаалла. Кэлэр сылга 6 км оҥоһуллара былааннанар, 2021 сылга Бүтэйдээххэ тиийиэхтээхпит”.
Өлөчөй баһылыга Николай Тимофеев “Саха сирэ” хаһыакка үөрүүтүн үллэһиннэ: «Биһиги Майаттан 55 км ыраах олоробут. Суолбут оҥоһуллан бүтэн үөрүүбүт улахан. Улууспут киинигэр, Дьокуускай куоракка туох да мэһэйи көрсүбэккэ киирэр-тахсар буоллубут. Суолбут салгыы оҥоһуллан, Бүтэйдээххэ тиийэн Чурапчынан Магадан суолугар тахсыахтаах».
Ньургуйаана ИВАНОВА, «Саха сирэ» хаһыат, edersaas.ru
Хаартыска: sakhalife.ru